O Concello e a Universidade reafirman os seus compromisos de colaboración
Por Redacción
A Vicerreitoría do Campus de Pontevedra e o Concello reafirmarán os compromisos que estableceron ao longo dos últimos anos e colaborarán para que o Green Campus "vaia adiante".
O compromiso adoptouse no transcurso da reunión que mantiveron este a vicerreitora en funcións do campus, Antonia Blanco, e as concelleiras de Cultura, Anxos Riveiro, e Servizos Sociais, Carmen Fouces. Fixeron balance dos proxectos que realizan conxuntamente e centráronse no programa sociocultural Tangram, que a Vicerreitoría impulsou coa colaboración de Cultura.
Anxos Riveiro confirmou a colaboración co Green Campus e sinalou que esa implicación da Administración local deberá definirse "de xeito global, non desde unha concellería particular, senón desde o propio Concello" coa idea de contribuír a que a cidade conte cun campus "forte e diferenciado".
Neste senso, Blanco sinalou que é un "gran proxecto" que non só vai ter unha repercusión na imaxe da Universidade e do campus, senón que tamén "vai ter unha gran repercusión cidade". O Green Campus suporá para a institución académica "unha imaxe consolidada de compromiso" co medio ambiente que "encaixa perfectamente cun coidado da cidade que xa ten tradición neste concello".
Carmen Fouces destacou que a xuntanza permitiu "reafirmar os compromisos que se estableceron durante estes anos" e que continuarán unha vez o decano de Ciencias Sociais e da Comunicación, Juan Manuel Corbacho, tome o relevo de Blanco á fronte da Vicerreitoría.
Blanco fixo énfase na "colaboración estreita" que lle brindou a Administración local ao longo dunha etapa que definiu como moi satisfactoria. "Poucas persoas teñen o privilexio de traballar para a súa cidade desde o seu ámbito profesional e a min a Universidade deume esta oportunidade", destacou.
Na mesma liña, Fouces destacou a "visión social da Universidade", que pasa por "abrir as portas para que as cousas flúan dun lado cara outro" e destacou que para a cidade "é un plus ter un campus universitario moi relacionado coa realidade do municipio".