Primeiros síntomas de mildiu nas viñas
Por Redacción
A Estación Fitopatolóxica de Areeiro, dependente da Deputación de Pontevedra, vén de publicar unha alerta fitosanitaria na que advirte do inminente risco de aparición dos primeiros síntomas de mildiu nas viñas da provincia.
Esta alerta prodúcese dado que o fungo causante da enfermidade xa acadou durante a fin de semana e o luns o 100% de desenvolvemento e, malia que aínda non se detectaron as primeiras manchas nas parcelas de seguimento que Areeiro controla en O Salnés, o grao de maduración do fungo, unido á predición de choivas para finais desta semana, fai prever que os primeiros síntomas aparezan nos próximos días.
Ante esta situación, recoméndase facer un seguimento das viñas e extremar a vixilancia para detectar síntomas e poder actuar coa rapidez que se require.
Neste sentido, os técnicos de Areeiro recomendan que, no caso de que non se vaia a realizar este seguimento específico, se proceda ao tratamento do viñedo cun funxicida sistémico ou penetrante antes de que cheguen as choivas.
Advirten, ademais de que o risco será maior se as choivas non veñen acompañadas cunha baixada considerable das temperaturas ou se se producen tormentas.