Os técnicos do Areeiro alertan dalgunhas ameazas para a vide
Por Redacción
Os técnicos da Estación Fitopatolóxica do Areeiro dependente da Deputación de Pontevedra, recomendan estar atento ao agromar das viñas para poder tratalas contra a excoriose en canto as follas estean en estado incipiente.
Advirten que a viña debe estar protexida contra este mal (que afecta a todas as partes verdes da vide) en canto as follas comecen a abrir (follas incipientes), algo que non tardará moito en acontecer, dado que nestes momentos na maioría das plantacións a vide xa conta con xemas infladas ou coas puntas verdes e, incluso, xa se detectan algunhas con follas incipientes ou abertas.
COMEZA O CICLO DE MILDIU
Así mesmo, os técnicos de Areeiro confirmaron que as primeiras oosporas do fungo que provoca o mildiu xa acadaron a súa maduración e, polo tanto, comezou o ciclo desta enfermidade.
Malia todo, lembran que non é preciso dar aínda ningún tipo de tratamento, porque non se dan as condicións meteorolóxicas nin de desenvolvemento da vide necesarias para que progrese a enfermidade.