Lérez une música e gastronomía con motivo da I Ourellada Gaiteira
Por Redacción
A Festa da Ourella de Lérez terá na edición deste ano 2014 unha vertente musical con maior protagonismo do habitual. Chegará da man da Asociación Cultural Gaiteiros das Rías Baixas, que este domingo 16 de marzo unirá música e gastronomía na iniciativa 'Gaiteira-Muiñeiras, Xotas e Cantares'.
A cita será a partir das 13.00 horas no adro do Divino Salvador de Lérez e contará coa presenza de múltiples gaiteiros da comarca de Pontevedra coñecedores e amantes do 'toque Pechado' característico das Rías Baixas.
O presidente de Gaiteiros das Rías Baixas, Alvaro Novegil, destaca "o bo traballo desenrolado por todolos colaboradores gaiteiros, que de xeito desinteresado apostan pola organización de eventos como este, que dignifican a figura do gaiteiro e poñen en valor o instrumento máis noso".
O acto gastromusical está enmarcado na Festa da Ourella de Lérez e conta co visto e prace da comisión organizadora. Gaiteiros das Rías Baixas desenrola as súas actividades na Casa da Cultura de Lérez, apostando pola recuperación do toque pechado da zona, característico dos grandes mestres Gaiteiros.
A Festa da Ourella, organizada a Asociación de Veciños San Bieito de Lérez, chega á súa oitava edición. Este ano presentarase como principal novidade a empanada de ourella e haberá un concurso de Ourella doce con tres premios á mellor preparación. A organización pretende que este ano se superen as 700 racións que se venderon durante a pasada edición.