Lores rexeita a subida do canon de Sogama que custaría un millón e medio máis ao ano a Pontevedra: "É un auténtico sablazo"
![Oskar](/web/cache/scene/uploads/xornalistas/foto/b40/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/573b7bbf54-perfil.jpg)
Por Oskar Viéitez
O alcalde de Pontevedra, Miguel Anxo Fernández Lores expresou este venres o seu rexeitamento á subida do canon anunciada por Sogama aos concellos para a xestión de residuos, que supoñerá un aumento de 66 a 108 euros por tonelada.
"Para o Concello de Pontevedra iso significa un incremento de millón e medio de euros anual", detallou o rexedor.
"É un auténtico sablazo que a Xunta de Galicia, a través de SOGAMA, faille a todos os cidadáns de Pontevedra a través dos concellos", manifestou o rexedor nacionalista nunhas declaracións recollidas por Radio Pontevedra.
"Cremos que non é de recibo, sobre todo cando a Xunta de Galicia está a facer unha política de residuos que prima a incineración e o envío a vertedoiro", valorou o alcalde.
Lores destacou que "no Concello de Pontevedra que tentamos reciclar o máximo posible e compostar, a pesar da oposición do Partido Popular á compostaxe".
Ademais incidiu en que o actual goberno municipal "levamos doce anos conxelando as taxas e os impostos".
Agora, ante esta subida anunciada por Sogama, en Pontevedra "tentaremos seguir con esta política de conxelación e non repercutir iso á cidadanía", dixo o alcalde.