BNG e PSOE irán á folga do 14-N, o PP acúsaos de "auténticos agitadores"
Por Alejandro Espiño
O Concello de Pontevedra súmase formalmente á convocatoria de folga xeral. E é que segundo o goberno local "sobran razón para a folga". Por iso é polo que no pleno extraordinario celebrado no Teatro Principal presentáronse senllas mocións de apoio ao 14-N, aínda que finalmente ambas, impulsadas por BNG e PSOE, votaranse conxuntamente ao ter o mesmo propósito, demostrar o seu apoio a esta mobilización.
Para o PSOE, esta folga débese á "situación inxusta" que se vive en España, segundo o concelleiro Agustín Fernández. "Favorécese aos mercados especulativos e recórtanse os dereitos dos traballadores", dixo, tras enumerar as medidas que tomou o Goberno de Mariano Rajoy nos últimos meses, entre as que destacou a privatización dos servizos públicos, a reforma laboral, o repagamento farmacéutico ou a paralización da lei de dependencia.
Pola súa banda, desde o BNG, César Mosquera afirmou que as políticas do PP están "afogando" a economía produtiva de Galicia. "O capitalismo está amosando a súa faciana máis cruel, máis insensible, máis inhumana", afirmou o edil nacionalista. Instó ademais á cidadanía a que forcen unha alternativa. "Hai que superar os medos, loitar polos nosos dereitos, mostrar rebeldía e insumisión fronte a maior inxustiza social que se recorda".
Pero o Partido Popular, que votou en contra destas mociones, foi moi duro coa posición do goberno bipartito. José Manuel Guillán, un dos seus edís, acusou a socialistas e nacionalistas de "auténticos agitadores". Entende que esta folga é "exclusivamente contra los trabajadores" e lamentou que se dediquen a "revolver y encondiar a la ciudadanía, en lugar de presentar propuestas y soluciones".
Guillán explicou que ante a situación "agonizante" de España, suscitar unha folga xeral é unha "barbaridad". Asegura que o 14-N afectará á imaxe exterior de España, á prima de risco e ao peto dos traballadores, cifrando en 3.000 millóns de euros o diñeiro que se perderá nesta xornada. "Es una grave irresponsabilidad, es bastante peligroso plantear ahora una huelga que no servirá para nada".