Denuncian roubos de equipamento deportivo e informático en dous campos de fútbol de Ribadumia
Por Redacción
Creada e actualizada
Creada e actualizada
O Concello de Ribadumia denuncia que "en pouco tempo" tiveron constancia de roubos en instalacións municipais como o campo de fútbol de A Senra e o campo de fútbol de Leiro.
Segundo a información facilitada polo Concello, nestes roubos forzaron as portas, arrincaron tubaxes de cobre e subtraeron equipamento informático e equipamento deportivo.
Desde o Concello sinalan que xa denunciaron os roubos na Garda Civil, que facendo as investigacións necesarias para tentar dar cos culpables destes delitos e que asuman as súas responsabilidades. Fontes oficiais da Garda Civil confirman que representantes municipais formalizaron dúas denuncias.
O Goberno local fixo públicos estes roubos para avisar á veciñanza e pedir aos cidadáns "que estean atentos" e, en caso de que vexan algunha persoa ou acción sospeitosa, avisen os Corpos e Forzas de Seguridade.
O Concello condena e rexeita tanto estes actos como outros vandálicos que "van en detrimento da nosa veciñanza" e avisan de que "estaremos pendentes e en constante contacto coa Garda Civil para tentar averiguar a identidade dos autores destes delitos".
Ademais, avisan de que tratarán de "levar a cabo un control máis disuasorio" para evitar estes actos nun futuro.