Comezan as prácticas do alumnado do Labora Xove vixiando as praias de Vilagarcía e instalando placas solares no Concello
Por Redacción
O alumnado das especialidades de socorrismo acuático e enerxías renovables do obradoiro Labora Xove 2023 iniciou nestes días o seu período de formación prestando apoio ao servizo de vixilancia das praias os primeiros, e instalando placas solares na Casa Consistorial os segundos.
Os 16 participantes no programa de emprego complementan a formación teórica recibida nos últimos meses coa realización de obras ou prestando servizos de utilidade pública ou interese social, unha "parte básica de cara á inserción laboral xa que lles permite poñer en práctica nun entorno de traballo real os coñecementos teóricos adquiridos previamente".
Na especialidade de socorrismo acuático, o alumnado desenvolve o seu servizo nas praias de Compostela e O Campanario (Bamio), prestando apoio ao servizo de socorrismo contratado polo Concello de Vilagarcía para dar cobertura a estes dous areais durante o verán e aprender como se organiza o traballo, cales son as principais funcións ou as incidencias coas que se atopan os socorristas no día a día.
No caso do alumnado de enerxías renovables, iniciou o proceso de execución dunha instalación solar fotovoltaica completa no edificio do Concello. Os alumnos encargáronse de todas fases de execución dunha obra, dende a recepción do material, replanteo segundo as indicacións do proxecto, instalación de soportes e placas solares, instalación eléctrica e posta en funcionamento.
O Programa de Emprego Labora Xove, promovido polo Concello de Vilagarcía de Arousa, enmárcase nas estratexias de emprego para persoas mozas do Sistema Nacional de Garantía Xuvenil, e está financiando con Fondos Europeos nun 60% a través do Programa FSE+ Galicia 2021-2027.
Relacionadas:
-
Operarios municipais e voluntarios quitan máis de catro toneladas de entullos da praia do Castelete
Por Redacción |
-
Vilagarcía terá oito dos doce socorristas solicitados e priorizará as praias con bandeira azul
Por Oskar Viéitez |
-
Vilagarcía non logra cubrir o número de prazas de socorristas para este verán
Por Anxo Lourido |