As farmacias de Pontevedra, aliadas na loita contra o mosquito tigre
Por Redacción
As farmacias de Pontevedra formarán parte dunha rede de alerta temperá que permitirá coñecer os posibles incrementos significativos de picaduras de insectos e avaliar se son de mosquito tigre. É a principal acción da campaña da Consellería de Sanidade e o Colexio de Farmacéuticos.
Con esta campaña, ambas partes destacan a importancia que ten a colaboración cidadá para o control deste vector de enfermidades como os virus do dengue, chikungunya ou zika.
Mediante esta iniciativa trasládanse as recomendacións para non contribuír á proliferación do mosquito tigre, evitar a súa picadura e fomentar o uso da app Mosquito Alert.
Esta aplicación permite enviar fotografías de mosquitos detectados, posibles lugares de cría e mesmo picaduras de mosquito para que sexan validadas por expertos do Consello Superior de Investigacións Científicas e da Rede Galega de Vixilancia de Vectores.
O ano pasado reportouse a presenza do mosquito tigre nos concellos de Moaña, Vigo, Cangas, Redondela e Vilaboa.
A vixilancia establecida pola rede abarca este ano a máis concellos da contorna co fin de estudar a posible expansión do mesmo.
No que vai de ano 2024, só se detectou na aplicación Mosquito Alert en Moaña e en Vigo, mentres que no trampeo da rede só se detectou nas mostras recibidas do concello de Moaña.
Relacionadas:
-
Premio Best in class para Montecelo como o Mellor hospital de Complexidade Alta
Por Oskar Viéitez |
-
Alerta da Xunta: evitar a auga estancada nas flores dos cemiterios para impedir a proliferación do mosquito tigre
Por Cristina Saiz & Anxo Lourido |
-
Confirman a presenza dun exemplar de mosquito tigre en Vilaboa
Por Redacción |