Dous feridos nun accidente laboral mentres traballaban nun guindastre elevador no polígono do Pousadoiro
![Natalia](/web/cache/scene/uploads/xornalistas/foto/9b5/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/577f8fbb69-hkm23_ri.jpg)
Por Natalia Puga
Dous traballadores resultaron feridos na mañá deste venres nun accidente laboral rexistrado nunha nave do polígono industrial do Pousadoiro na que traballaban sobre un guindastre elevador.
Ata o lugar do accidente desprazáronse efectivos de Emerxencias de Vilagarcía con varios vehículos, o Consorcio Provincial de Bombeiros, axentes das policías Local e Nacional e dúas ambulancias do 061.
O sinistro ocorreu sobre as 9.30 horas da mañá e os dous operarios foron trasladados ao Hospital do Salnés. As lesións, en principio, non teñen maior gravidade, á espera de valoración médica.
Segundo unha primeira valoración, un dos traballadores presentaba unha escordadura nun nocello e o outro tiña erosións, un golpe na cabeza e dor de costas.
Segundo a información facilitada pola Policía Nacional, os dous traballadores estaban sobre un guindastre elevador, caeu o hidráulico e quedou torcida. Como consecuencia, os dous resultaron feridos.
Segundo a información facilitada polo 112 Galicia, o accidente laboral produciuse cando o guindastre elevador sufriu un desnivel de tres metros.
Os dous feridos tiveron que ser rescatados polos bombeiros de Vilagarcía. Desde o servizo de emerxencias indicaron que os dous traballadores estaban a reparar unha nave e, por causas que aínda hai que determinar, cedeu dun dos dous lados.
Os bombeiros tiveron que subir ata o lugar no que estaba o guindastre elevador para realizar un rescate de altura e impedir que o guindastre caese ao chan. Unha vez rescatados os traballadores, baixouse a plataforma de forma controlada.