Pontevedra estrea un mapa pioneiro que mide a eficiencia enerxética das áreas residenciais
Por Alejandro Espiño
Pontevedra é a primeira cidade que conta cun completo estudo da eficiencia enerxética de todo o seu parque residencial. Trátase dun innovador sistema que, ademais de recoller os datos actuais, fai estimacións dos efectos que terían as posibles rehabilitacións.
Os responsables do proxecto Litheum, impulsado pola Universidade da Coruña, explicaron que decidiron probar esta iniciativa en Pontevedra porque "xa a coñecíamos" e porque o seu tamaño e a súa morfoloxía urbana resultáballes perfecta para traballar nesta ferramenta.
Así o destacou o profesor Jorge Rodríguez Álvarez, coordinador desta aplicación que elaborou con oito persoas máis, entre eles os alumnos Erick Morales, Natalia Alvaredo, Tirso Varela e Vicente López, e que é accesible e gratuíta a través de calquera navegador.
O proxecto tiña como obxectivo inicial desenvolver un modelo urbano de demanda de enerxía da edificación integrado nunha plataforma en liña, ao tempo que permitir realizar estimacións dos efectos de políticas e plans de eficiencia enerxética nas cidades.
Na práctica, segundo o edil de Urbanismo, Alberto Oubiña, ofrece un modelo de cálculo da demanda enerxética en edificios residenciais, creando mapas para estimar o aforro enerxético potencial no caso de facer unha reforma nunha vivenda unifamiliar ou nun edificio.
A través da súa web https://litheum.citic.udc.es/ é posible consultar a estimación enerxética de todas os edificios residenciais do municipio e o que se reduciría o consumo no caso de aplicar illamentos térmicos ás fachadas ou aos tellados ou cambiando as ventás.
Rodríguez Álvarez asegurou que, se ben pode haber ferramentas xa existentes e semellantes, ningunha é igual a Litheum, "xa que non son mapas estáticos e ofrece un forte elemento interactivo".
Así, non se limita a ofrecer "unhas cores ou unhas capas de información", senón que se poden mudar os parámetros e solicitar nova información e pode accederse a ela a través de Internet.
De entrada, os datos que se extraen desta ferramenta subliñan que as zonas nas que as vivendas teñen unha menor eficiencia enerxética son as máis antigas, situadas principalmente no centro histórico ou nos barrios da Seca e Salgueiriños, xunto coas das parroquias rurais.