Un roteiro pon o foco no Valdecorvos, un río "descoñecido ata o punto de que a xente non sabe nin por onde vai"
Por Cristina Saiz & Natalia Puga
O Valdecorvos é un dos tres ríos que ten Pontevedra e, con todo, é "descoñecido ata o punto de que a xente non sabe nin por onde vai". Para reverter a situación, diversos colectivos da contorna decidiron este sábado poñer en marcha un roteiro informativo e reivindicativo para dar a coñecer a súa historia e as problemáticas actuais.
Inundacións, obras e verteduras son na actualidade as principais ameazas que hai sobre este río, pero non sempre foi así, era un espazo de grande riqueza natural, e este roteiro buscou tamÉn dar a coñecer esa parte da historia.
A actividade estivo auspiciada polos residentes na rúa Padre Fernando Olmedo e a urbanización de Valdecorvos, pero tivo o apoio de moitos outros colectivos, entre eles, a asociación veciñal Altamira - San Antoniño, Vaipolorío, a Asociación Pola Defensa da Ría (APDR), a entidade ecoloxista Adega e o centro social A Pedreira.
Durante dúas horas, percorreron o leito do río recibindo todo tipo de explicacións entre o Centro Galego de Tecnificación Deportiva (CGTD) en Fernando Olmedo e a avenida de Lugo. Aínda que no tramo inicial se xuntaron só unas 40 persoas, durante o percorrido foron sumándose moitas máis, ata sumar entre 60 e 70.
David Pereira, da asociación veciñal de Altamira e San Antoniño, explicou que o obxectivo que buscaban era "dar a coñecer o río e que a xente o puidera percorrer" e lograron cumprilo. Así, mesmo hai zonas que se rozaron nos últimos días e as persoas que participaron puideron cruzar desde Fernando Olmedo ata José Malvar directamente.
"A xente sorprendeuse de poder ver por onde ía o río", destaca David Pereira, que explica que este é o primeiro roteiro que percorre todo o río e confía en pode profundar no coñecemento deste espazo e que se poida chegar a todo o percorrido fluvial.
Durante o percorrido, foron realizando paradas e, en cada unha, especialistas de distintos ámbitos afondaron no coñecemento deste río. A primeira en tomar a palabra foi Cristina García Fontán, arquitecto especializada en Urbanismo da ETSA de A Coruña que colabora co Concello de Pontevedra na Cátedra de Espazo Público e explicou como era a zona de Fernando Olmedo no pasado, poñendo en contexto que no pasado non había as inundacións actuais porque non se gañara espazo ao río de forma artificial.
Á altura da ponte dos Tirantes tomou a palabra Antón Masa, da APDR, que abordou o mal estado xeral da Ría de Pontevedra e do río Lérez e todo o que queda por facer para recuperar as augas de Pontevedra e do río Valdecorvos, afectado por aliviadoiros e verteduras de augas fecais.
Nos vindeiros meses, estes colectivos traballarán para organizar máis actividades dentro da súa aposta máis ampla de posta en valor do río de Valdecorvos e dos espazos e barrios que atravesa para poñelo na axenda da cidade.
Relacionadas:
-
Veciñanza da contorna do rego de Valdecorvos convoca unha marcha de protesta para este sábado
Por Redacción |
-
Veciños de Fernando Olmedo e do barrio de San Antoniño, en pé de guerra
Por Mónica Patxot & María José Pita |
-
O barrio de Altamira afianza os seus vínculos cun segundo magosto
Por Redacción & Mónica Patxot |
-
Altamira ármase de paciencia, vasoiras e capachos para limpar o barrio
Por Anxo Lourido |
-
A veciñanza de Altamira demanda ao Concello limpeza e coidado dos xardíns deste barrio
Por Redacción |
-
Así é a reforma urbana que busca "darlle unha volta" ás rúas Altamira e Vilar Ponte
Por Alejandro Espiño & Mónica Patxot |
-
Unión do barrio de Altamira para un magosto multicultural con comida caseira e festa
Por Redacción |
-
O barrio de Altamira constitúe unha asociación e pide que se aplique nesta zona o "modelo Pontevedra"
Por Natalia Puga |
-
"O barrio de Altamira tamén existe" e busca unir forzas para reivindicar máis limpeza e coidado
Por Natalia Puga & Mónica Patxot |