Logran capturar un bovino de máis de 500 quilos que circulaba libremente por Caldas
Por Redacción
Un touro de gran tamaño levaba catro días causando preocupación nos municipios de Caldas, Cuntis e Portas.
Segundo relatan desde o Concello de Caldas, a súa presenza chegou a provocar algún susto aos condutores das estradas destas vilas.
Por este motivo, un grupo de dez veciños, axentes da Policía Local, voluntariado de Protección Civil e tamén concelleiros da corporación de Caldas decidiron iniciar un traballo de procura do exemplar de máis de 500 quilos de peso polos montes de Arcos, Santa María e San Andrés.
Ao Concello de Caldas preocupáballe que puidese causar algún accidente de circulación xa que o animal movíase libremente ou que causase danos en propiedades privadas.
Despois de varios días de procura, o equipo de procura lograba capturalo no interior dunha leira dunha casa no lugar de Paradivas, na parroquia de San Andrés.
Inicialmente o animal ao verse acurralado alterouse ante a presenza das persoas que lle rodeaban. Foi necesario esperar a que se acougase para conducilo a un curral próximo, segundo as mesmas fontes.
Na acción colaborou tamén persoal de Protección Civil de Cuntis e de Portas, ademais de veciñanza de Briallos.