"Estado lamentable" do Parque dos Sentidos e demanda de mantemento
Por Redacción
O BNG de Marín, a través da súa portavoz Lucía Santos, trasladou á Comisión informativa de Turismo e Comercio as deficiencias detectadas no Parque dos Sentidos, un espazo de lecer para un ambiente familiar na Finca de Briz.
Denuncian o mal estade da pasarela de madeira na zona do estanque, as madeiras rotas e pezas de pedra despegadas nas bancadas do auditorio; as filtracións de auga que asolagan o lavadoiro; mal estado de varias esculturas de madeira; abandono da área de herbas aromáticas; rotura de pezas no parque infantil e, en xeral, falta de limpeza e mantemento en todo o recinto.
Santos solicitou á presidenta da Comisión, Cristina Acuña, unha intervención inmediata e "sen escusas" para restaurar todo o material danado para que o Parque dos Sentidos poida ser utilizado pola veciñanza de Marín durante estes meses de verán.
A portavoz nacionalista móstrase alarmada pola "deixadez total e absoluta do goberno municipal" acusando o Partido Popular de "pésima xestión" deste espazo que funciona como pulmón verde de Marín e punto de atracción para moitos visitantes.
Lembran que o BNG solicitou ao goberno local de María Ramallo en setembro de 2023 unha intervención urxente debido ao grave estado de abandono en que se atopaba.
O pleno municipal aprobou, por unanimidade, unha moción para realizar a restauración integral do Parque dos Sentidos coa restitución do material danado e gastado. Unha moción que segue sen executarse, segundo denuncia a agrupación nacionalista nove meses máis tarde.