Inaugurada a reforma do local da Escola de Música de Cerdedo
Por Oskar Viéitez
O alcalde do Concello de Cerdedo-Cotobade, Jorge Cubela, e membros da Banda de Música de Cerdedo, asistiron ao acto inaugural das obras de reforma realizadas no local da Escola de Música de Cerdedo.
A empresa Dexo foi a encargada de levar a cabo esta actuación, que supuxo un investimento duns 120.000 euros, e que permitiu adaptar ás necesidades dos músicos e os docentes as vellas instalacións seguindo o deseño funcional da arquitecta local Mercedes Fernández Díaz.
Ademáis mellorouse a eficiencia enerxética e modernizáronse as instalacións.
"Sentímonos moi orgullosos do labor que facedes, da vosa traxectoria e da vosa proxección de futuro por iso apostamos por que dispoñades das mellores instalacións posibles para que teñades a oportunidade de chegar ata o máis lonxe posible nas vosas carreiras musicais levando sempre con orgullo o nome do noso concello alá por onde actuades", dixo no seu discurso o alcalde.
PRIMEIRO VISITANTE DO ALBERGUE
Por outra banda, este sábado a portavoz do grupo municipal do Partido Socialista de Cerdedo-Cotobade, Ana Couto criticou que onte venres chegou un peregrino disposto a pernoctar no albergue ubicado en Carballedo, pero "cal foi a súa sorpresa cando non puido acceder ás instalacións" xa que "ainda non se encontra operativo" a pesar de que o Concello anunciou que "todo estaba listo para acoller aos primeiros peregrinos, o que resultou ser unha falacia".
O peregrino procedente de Portugal tivo que pasar a noite no pavillón de deportes.