A partir do 22 de xuño Sanxenxo estreará un servizo de transporte urbano
Por Oskar Viéitez
Sanxenxo estreará o próximo 22 de xuño e ata o 8 de setembro un novo servizo urbano de transporte público municipal cunha lanzadeira e dúas liñas circulares.
O alcalde, Telmo Martín; o conselleiro de Presidencia, Xustiza e Deportes, Diego Calvo, e o presidente de Monbus, Raúl López, en representación da UTE XG-626, asinaron esta semana un convenio para a implantación este servizo, integrado no sistema de tarifas único e bonificado, activado pola Xunta de Galicia.
O obxectivo é contribuír a reducir o uso de vehículos particulares e fomentar a mobilidade sostible do municipio, así como a súa promoción turística.
Os usuarios das novas liñas municipais poderán beneficiarse dos descontos e vantaxes da Tarxeta de Movilidad de Galicia (TMG), con bonificacións que na actualidade chegan ao 50%. Ademais, os menores de 21 anos poderán realizar 60 viaxes ao mes de modo gratuíto coa Tarxeta Xente Nova e todas as persoas maiores de 65 anos coa TMG viaxarán gratis.
O custo de implantación dos novos servizos de transporte público urbano en Sanxenxo ascende a 162.740 euros ao ano e será sufragado polo Concello.
O prezo do billete será de 1,55 euros sen desconto
A medida desenvolverase este ano coa posibilidade de prórroga. O prezo do billete será de 1,55 euros sen desconto.
O acordo establece a implantación de dúas liñas circulares, con dous autobuses, coa igrexa de Sanxenxo como punto de inicio e fin, que percorre de forma lineal todo o municipio con 58 paradas nun tempo estimado de 50 minutos. Unha transcorrerá por Vilalonga e a outra pola Lanzada, con saída e chegada á igrexa de Sanxenxo.
En total súmanse seis paradas novas con respecto ás xa existentes no municipio: Iglesia de Sanxenxo, Hotel Terraza, Paxariñas, Hotel Atlántico, Delfín Azul e Vinquiño-Tanatorio. Haberá 32 expedicións diarias, tanto de ida como de volta, con saídas cada hora desde as 8 ata a 23 hora no caso das idas, e desde as 8:30 ata as 00:30 no caso das voltas.
Ademais, poñerase en marcha un novo servizo de lanzadeira desde o parque empresarial de Nantes con paradas no Hotel Terraza e en Baltar (rotonda Hipercor) cunha duración estimada de 15 minutos.
O Concello acondicionará unha parcela municipal próxima á subestación eléctrica como aparcamento gratuíto para os usuarios da lanzadeira. Haberá 32 expedicións diarias cada media hora, entre as 8 e as 23:30 horas. A través desta iniciativa búscase dar resposta as necesidades de mobilidade colectiva detectadas en Sanxenxo, conectando diversos puntos do Concello e servindo de conexión cos servizos de transporte regular de viaxeiros de uso xeral. A medida permitirá tamén diminuír a conxestión viaria.
Relacionadas:
-
As dúas liñas circulares e a liña lanzadeira de Sanxenxo tiveron unha media de 405 usuarios diarios
Por Redacción |
-
14.168 persoas utilizaron as novas liñas de autobús de Sanxenxo
Por Redacción |
-
"Moderadamente satisfeitos" en Sanxenxo co aumento de usuarios das novas liñas de transporte público
Por Redacción |
-
Os socialistas denuncian que o bus circular discrimina a Bordóns, Dorrón e a Nantes
Por Oskar Viéitez |
-
Haberá 88 servizos de bus adicionais á semana entre Sanxenxo e Pontevedra
Por Oskar Viéitez |
-
58 paradas en dúas liñas circulares e unha lanzadeira conectarán o transporte en Sanxenxo
Por Redacción |
-
Sanxenxo quere crear un aparcadoiro disuasorio con autobuses lanzadeira ao centro
Por Oskar Viéitez |