Reforzarán a seguridade do edificio que alberga o Servizo de Patrimonio Documental e Bibliográfico
Por Redacción
O edificio que alberga o Servizo de Patrimonio Documental e Bibliográfico verá reforzada a súa seguridade co fin de evitar problemas de convivencia e inseguridade.
Para iso, a Deputación de Pontevedra encargará a redacción dun proxecto que definirá as actuacións necesarias para incrementar a seguridade no edificio, entre as que se atopa a colocación dun enreixado exterior no acceso ao edificio, onde se atopan as escaleiras e a rampla.
A proposta considerará o valor patrimonial da edificación, a funcionalidade e a racionalidade do sistema de recollida de augas, o seu mantemento e a racionalización no sistema construtivo.
O edificio recolle, organiza e serve a documentación producida polos servizos e organismos da Deputación de Pontevedra, xunto con aqueles outros fondos e coleccións documentais recibidas. Ademais, a través deste servizo edítanse libros, o que implica a análise do orixinal e a súa valoración para incluír na liña editorial da institución provincial, e organízanse xornadas e cursos de carácter monográfico, como os que anualmente promove arredor da heráldica.