Veciños de Fernando Olmedo e do barrio de San Antoniño, en pé de guerra
Por Mónica Patxot & María José Pita
A paciencia dos residentes de Padre Fernando Olmedo e rúas adxacentes, así como a do veciño barrio de San Antoniño, en Pontevedra, está esgotada.
Levan décadas reclamando unha solución ás inundacións que periodicamente arrasan as rúas que discorren sobre a canle do rego de Valdecorvos, que foi desviado e soterrado a mediados do pasado século.
A memoria recente dos veciños lembra o último episodio grave ocorrido en outubro de 2022. Entón, as fortes choivas de madrugada, coincidindo coa preamar, provocaron numerosos danos. Este suceso súmase a outras moitas inundacións periódicas que, aínda que de menor magnitude, ocasionan o malestar entre os veciños e comerciantes da rúa Padre Fernando Olmedo e lindeiras.
Que ocorreu agora para que un grupo de veciños decida dar un paso á fronte? Esta expresión non é só unha metáfora. Van realizar unha marcha real de protesta, como se explicará liñas máis abaixo.
O nacemento da Asociación de Veciños Altamira - San Antoniño o pasado 23 de maio é o motivo que uniu aos residentes que, tras anos de escritos e encontros con diferentes dirixentes políticos, viven con impotencia ser unha das zonas esquecidas de Pontevedra. "Non vivimos na milla de ouro, aínda que estamos preto, pero si somos cidadáns que pagamos os nosos impostos, non nos merecemos isto", clama un destes veciños.
Cabe lembrar que San Antoniño e Fernando Olmedo son dúas rúas comunicadas a través de diferentes conexións: as costas de Casimiro Gómez e Perfecto Feijoo, e varias escalinatas que arrincan en Antón Vilar Ponte, Altamira e San Antoniño.
A reclamación de que se busque unha solución ás inundacións está na axenda desta nova asociación veciñal, entre outras demandas, como a humanización e limpeza do barrio.
Con todo, un feito precipitou a reacción dos veciños, e esta é a razón pola que convocan a PontevedraViva: a aparición de grandes manchas marróns no río Lérez, á altura da ponte dos Tirantes, o punto onde desemboca o rego de Valdecorvos. O mesmo arroio que discorre por baixo do pavimento dende o seu soterramento por baixo de Casimiro Gómez, entre os números 12 e 14 desta rúa, e continuar o seu paso subterráneo por Padre Fernando Olmedo, Xosé Malvar, Padre Gaite e Avenida de Bos Aires ata a súa saída ao Lérez.
Veciños e comerciantes temen que unha acumulación de verteduras no rego de Valdecorvos estea "diminuíndo a capacidade desta canalización, co que aumenta o risco e gravidade das inundacións en Fernando Olmedo", manifesta o presidente da A.V. Altamira - San Antoniño, David Pereira.
Pereira é quen remite a este medio a serie de fotografías que realizou en dúas datas, 5 e 11 de xuño, rexistrando as enormes manchas, aparentemente de lodos, que reafirman a alarma dos veciños. Foi por mor de ver que o rego de Valdecorvos discorría coa auga turbia e ler noticias sobre as verteduras de terra de, supostamente, as obras das novas vivendas en Valdecorvos, que comezou a fixarse no curso do río.
"Os días que cadraba que saía a correr fixábame, tanto na ponte dos Tirantes como aquí no río de Valdecorvos. É dicir, sempre que saía o río turbio saían as mesmas manchas no Lérez, e polos mesmos días estaban arriba (en Valdecorvos) denunciando vertidos de terra no río", comenta o representante veciñal. Esta turbiedade, insiste, apréciase practicamente a diario, sobre todo pola mañá "que supoñemos que é cando fan os deterres".
"O que lle preocupa aos veciños é que se realmente arrastra toda esta terra e xa non desauga ben e hai tramos moio longos que está soterrado o río, como se acumule toda esa terra as inundacións van ir a peor", engade.
Temen que, se ninguén o remedia, o día que volva coincidir a preamar con choivas fortes se produza un gran tapón na canalización do arroio que provoque unha tromba de auga de consecuencias impredicibles.
Temen que cando coincida a preamar con choivas fortes se produza un gran tapón e unha tromba de auga de consecuencias impredicibles
A acción máis inmediata destes veciños é a convocatoria da primeira Marcha Fernando Olmedo - Valdecorvos o vindeiro sábado 29 de xuño ás 11 da mañá. O percorrido arrincará nas portas do Centro Galego de Tecnificación Deportiva e continuará pola rúa Fernando Olmedo e Rúa da Seca para desviarse cara á Travesía 1ª á Rúa da Seca e, seguindo a canle do rego de Valdecorvos, cruzar por Xosé Malvar cara á Rúa da Sequiña e, remontando o río, ao finalizar o Parque de Valdecorvos, subir á Avenida de Lugo para rematar a marcha no aparcamento do supermercado Aldi.
Nestes días empezarán a distribuír os carteis para que todas aquelas persoas que desexen apoiar esta reivindicación se unan á marcha. "Xuntouse un problema de moitos anos (as inundacións) co outro problema dos vertidos en Valdecorvos que aínda pode agravar o outro, e é o momento de que un río que está esquecido sexa recuperado", lamenta Pereira.
Engade o representante veciñal un elemento máis para a reflexión: "o altercado que houbo na casa abandonada o outro día (o home que curtou no pescozo ao compañeiro de vivenda) foi aí ao lado do río, por iso é tan importante recuperar esta zona" que, ademais, se atopa a pouca distancia do centro da cidade de Pontevedra.
Relacionadas:
-
Prohíben aparcar na rúa Antón Vilar Ponte para non bloquear as entradas ás vivendas
Por Redacción |
-
Un roteiro pon o foco no Valdecorvos, un río "descoñecido ata o punto de que a xente non sabe nin por onde vai"
Por Cristina Saiz & Natalia Puga |
-
Veciñanza da contorna do rego de Valdecorvos convoca unha marcha de protesta para este sábado
Por Redacción |
-
Un mozo de 20 anos, detido en Pontevedra por intentar matar o seu compañeiro de piso cortándolle o pescozo
Por Alejandro Espiño |
-
A desesperación dunha veciña tras meses denunciando lodos, gasolina e fecais no rego de Valdecorvos
Por Mónica Patxot & María José Pita |
-
Alertan da presenza dunha nova vertedura no río Lérez
Por Redacción |
-
Fernando Olmedo, un barrio afundido entre o enfado e a resignación
Por Manu Otero |
-
Pontevedra ve "case imposible" impedir as inundacións en Fernando Olmedo e estuda medidas para "mitigalas"
Por Alejandro Espiño |
-
Caos en Fernando Olmedo: coches mergullados, pisos sen calefacción e contedores flotando
Por Manu Otero & Cristina Saiz |