Portos de Galicia ultima a mellora do acceso ao porto de Raxó coa previsión de rematar nas próximas semanas
Por Oskar Viéitez
Portos de Galicia está a traballar na última fase das obras de remodelación, humanización e mellora da seguridade viaria no acceso ao porto de Raxó.
O conselleiro de Mar, Alfonso Villares visitou este martes estes traballos acompañado polo delegado territorial da Xunta en Pontevedra, Agustín Reguera, polo alcalde de Poio, Ángel Moldes, e o presidente do ente público, José Antonio Álvarez.
Estes traballos son o resultado dun convenio de colaboración entre Portos de Galicia e o Concello de Poio. A actuación global está orzada en máis de 900.000 euros, dos que Portos de Galicia financia o 70%, 640.000 euros, e o Concello, o 30%, 275.000 euros.
O alcalde de Poio, Ángel Moldes sinalou que este proxecto "nace da man dos propios colectivos" locais como son a asociación de veciños, a Sociedade Cultural Deportiva de Raxó e da Sociedade Cultural Deportiva de Samieira polo que recalcou o seu carácter de "proxecto integrador" ademais de "totalmente necesario e prioritario para o noso Concello".
Moldes espera que a obra poida ser entregada antes das festas de San Xoán.
O Concello asumirá a partir de entón o mantemento do vial, a vixilancia das instalacións, a regulación do tráfico -garantindo de maneira permanente o acceso ao dique e a actividade portuaria- e a recollida de residuos da zona portuaria.
As obras consistiron na humanización do vial con criterios máis amables para os peóns e incluíron a rede de instalación de servizos urbanos. Ademais integra a demanda de actuar de maneira xeral nas beirarrúas que se atopan fóra do chan de competencia de Portos de Galicia, mellorando un itinerario peonil, separado do tránsito rodado, desde a estrada xeral ata o paseo do porto.
Finalmente, o proxecto inclúe tamén o aumento da calidade do espazo, mediante a colocación de novo mobiliario urbano. Así mesmo, recolle a mellora da eficiencia e estética da rede de iluminación, así como as redes de abastecemento, pluviais e fecais e reforzarase a sinalización.