O PSOE propón construír un "macroedificio" que acolla aos Bombeiros, Protección Civil e ás Policías Local e Nacional
Por Oskar Viéitez
O grupo municipal do Partido Socialista presentará unha moción para o seu debate no pleno da próxima semana na que pide ao Concello de Pontevedra que inicie "con carácter urxente" os trámites para a construción dun novo edificio municipal de emerxencias, que acolla as dependencias da Policía Local, dos Bombeiros e de Protección Civil nun único inmoble.
Pero os socialistas tamén queren que nese "macroedificio" tamén inclúa as dependencias da Comisaría Provincial da Policía Nacional.
O portavoz local do PSdeG-PSOE, Iván Puentes, entende que o Concello de Pontevedra debe aproveitar esta "oportunidade histórica" para "estudar co Ministerio do Interior do Goberno de España unha posible colaboración que se traduza na construción e na xestión conxunta dese novo edificio de emerxencias".
Para o PSOE esta proposta de "macroedificio" supoñería "reducir custos de construción" porque sería un "financiamento compartido" entre o Concello e o Goberno de España e conlevaría unha serie de vantaxes como o incremento da coordinación entre as dúas policías que actúan na cidade.
Os concelleiros socialistas queren que se faga un estudo para buscar unha localización para construír ese edificio con todos estes servizos incluídos.
Iván Puentes comentou que esta proposta foi acordada cos representantes dos traballadores do Concello de Pontevedra, "fundamentalmente de Policía Local e de Bombeiros", e tamén está "falada e consensuada" cos tres principais sindicatos da Policía Nacional, o SUP, a CEP e JUPOL.
"Propoñemos ser ambiciosos", dixo Iván Puentes que pediu "altura de miras" para "prestar un mellor servizo á cidadanía e poder nese novo edificio de emerxencias concentrar todos os servizos que traballan no Concello de Pontevedra, independentemente da administración da que dependan".
Relacionadas:
-
Acordo unánime para impulsar a Illa das Esculturas e para construír un edificio municipal de emerxencias
Por Alejandro Espiño |
-
A parcela de Valdecorvos segue a ser a opción favorita para construír a nova sede da Policía Local
Por Oskar Viéitez |
-
A modificación de crédito será o asunto máis destacado do pleno do próximo luns
Por Oskar Viéitez |
-
Situar a Comisaría na Casa do Mar, unha "oportunidade inmellorable" para os veciños de Mollavao
Por Natalia Puga |
-
Unha nova comisaría, "prioritaria" para unha Policía Nacional que puxo os seus ollos na Casa do Mar de Mollavao
Por Alejandro Espiño |