Poio inaugura os cursos gratuítos de alfabetización e competencias dixitais transversais
Por Oskar Viéitez
O alcalde, Ángel Moldes e a concelleira de Promoción Económica, Maritxe González, inauguraron este luns os dous primeiros cursos de alfabetización e competencias dixitais transversais organizadas polo Concello de Poio.
En total, son oito formacións gratuítas que buscan facilitar ao alumnado os coñecementos básicos para que poidan realizar comunicacións e transaccións seguras por internet, utilizando os seus propios dispositivos electrónicos e familiarizándose con novas oportunidades de formación e aprendizaxe.
Moldes agradeceu o interese do alumnado e subliñou "a importancia e a oportunidade que ofrecen este tipo de cursos para reducir a fenda dixital. Non só a nivel persoal ou social, hoxe estar conectados é tamén importante para mellorar a empregabilidade, para relacionarse coas administracións ou para facer calquera outro tipo de xestión diaria".
Cada curso ten 32 horas de duración, e impártese na modalidade presencial na aula de informática situada na Reiboa. Hai oito edicións diferentes, que se desenvolverán entre xuño e novembro, cun máximo de quince persoas en cada unha.
As persoas interesadas pódense inscribir en calquera dos cursos que quedan por celebrarase nun formulario que atoparán na páxina web poiodixitaliza.es ou solicitar información no teléfono 604 039 575.
LICITACIÓN VESTIARIOS DA SECA
Por outra banda, o Concello de Poio ten aberto o prazo de licitación para que as empresas interesadas en crear os dous novos vestiarios no campo de fútbol da Seca presenten as súas ofertas. Trátase dun contrato menor, de preto de 48.000 euros, para o que poden presentar as súas ofertas ata o 20 de xuño ás 14.00 horas a través da Plataforma de Contratos do Sector Público.
O proxecto plantexa crear estes dous novos vestiarios, un para equipo local e outro para visitante, adaptando o espazo existente baixo as gradas, onde están os antigos baños e a sede da SCD. Con esta actuación, o Concello de Poio dará resposta a unha demanda histórica dos clubs locais e facilitará que os usuarios poidan cambiarse na propia instalación, ofrecendo maior comodidade.
Ata o de agora, os equipos tiñan que desprazarse ata outros espazos deportivos da contorna para facelo, como por exemplo o campo da Reiboa ou o propio ximnasio, unha molestia que empeora en caso de choiva.
Relacionadas:
-
A Deputación organiza dous cursos para formar os máis pequenos en competencia dixital
Por Redacción |
-
Ángel Moldes fai un balance positivo do seu primeiro ano de goberno: "Poio é máis vivo, dinámico e atractivo"
Por Redacción |
-
Alexis Viéitez recupera o trono da Subida á Escusa
Por Diego Espiño |
-
Un gran Poio Pescamar gaña o Burela (3-0), iguala a semifinal e soña en grande
Por Diego Espiño |
-
Poio mellorará o firme e completará a rede de pluviais no Camiño do Outeiro de Fontenla
Por Redacción |