Antía Yañez e María Piñeiro, recoñecidas cos premios 'Mulleres que opinan'
Por Oskar Viéitez
Os artigos 'As leis de Newton' de Antía Yañez e 'Hablar' de María Piñeiro foron seleccionados polo xurado como merecedores dos premios 'Mulleres que opinan', convocados pola Deputación e o Concello de Pontevedra.
Na escalinata principal do Pazo Provincial tivo lugar este luns o acto de entrega destes galardóns impulsados no marco do foro 'As mulleres que opinan son perigosas' e que buscan promover o exercicio da opinión xornalística e fomentar o nacemento dunha nova "canteira de mulleres opinadoras".
Os premios están dotados con 1.000 euros cada un, escritos en galego e castelán, e tratan de temáticas que foron abordadas naquel foro celebrado os días 15 e 16 de marzo.
Este ano presentáronse 25 textos a estes premios, 16 deles escritos en galego. Son máis que na anterior edición e puxéronllo "moi difícil ao xurado" coa súa "mirada crítica e feminista", segundo explicou Diana López, impulsora xunto á tamén xornalista Susana Pedreira de 'As mulleres que opinan son perigosas'.
Neste acto o presidente da Deputación, Luis López destacou que "a provincia é feminista" e que o encontro 'As mulleres que opinan son perigosas' é "moito máis que un foro é un fenómeno social" que "promove e incentiva unha sociedade crítica e activista" e tamén "pon o foco na igualdade, na inclusión, a conciliación e a educación".
Pola súa banda, o alcalde Miguel Anxo Fernández Lores engadiu que as dúas administracións seguirán a apoiar este foro tendo presente que "quédanos moitísimo por facer" en pro dunha igualdade plena.