Corenta persoas estrean a nova xeira de visitas guiadas a Santa Clara
Por Redacción
Santa Clara volveu a abrir as súas portas á cidadanía. Foi co inicio dunha nova xeira de visitas guiadas polo antigo convento. Desta vez, foron 40 persoas as que coñeceron os seus segredos, repartidas en dúas quendas de vinte, entre onte venres e este sábado.
Os asistentes comezaron o percorrido na igrexa e visitaron estancias como o coro baixo, o coro alto, o claustro ou a zona verde do convento, catalogado como ben con protección para a conservación monumental.
Estas visitas terán continuidade coas quendas previstas para as próximas fins de semana, os días 15, 16, 22 e 23 de xuño.
Todas elas celebraranse ás 11:00 horas, guiadas polo persoal da área de Educación do Museo de Pontevedra e cunha duración dunha hora.
Desde o Museo destacan o enorme interese que espertan estas visitas, xa que se esgotaron en só dous minutos as 120 prazas postas á disposición da cidadanía.