Grande-Marlaska pide á mocidade do Toural, en Vilaboa, que sexa "protagonista" da seguridade física e virtual
Por Mónica Patxot & Anxo Lourido
Fernando Grande-Marlaska, ministro do Interior, visitaba este xoves Vilaboa. En concreto, acudía ao Centro Público Integrado do Toural ao mediodía para presidir a entrega dos premios do plan director para a convivencia e mellora da seguridade escolar nos centros educativos e as súas contornas.
Ao acceder ao pavillón do centro onde se celebraba o acto, o ministro era aplaudido por un grupo de estudantes desde as xanelas das aulas, aos que Grande-Marlaska saudaba coa man.
Á cita acudían tamén o conselleiro de Educación, Román Rodríguez, o delegado do Goberno, Pedro Blanco; o subdelegado, Abel Losada, e o alcalde de Vilaboa, César Poza.
Durante a súa intervención, Fernando Grande-Marlaska incidiu na importancia da educación como "la herramienta más poderosa que existe" coa intención de garantir a seguridade da sociedade e poñía en valor as accións que os corpos e forzas de seguridade do Estado realizan nos centros de educación para sensibilizar ao alumnado sobre o acoso, a discriminación e a prevención da delincuencia.
O ministro pedía "no permanecer impasibles" ante o acoso e a loitar contra calquera tipo de discriminación e "erradicar la violencia sobre la mujer". A esta petición sumaba tamén a importancia que teñen entre a mocidade previr o consumo de alcohol e de drogas.
Ademais, destacaba a importancia de protexerse fronte aos riscos actuais da internet e fundamentalmente das redes sociais.
Neste sentido, Grande-Marlaska retouse a facer un "reel" tentando cumprir con esa norma das redes sociais nas que se indica que oito segundos é o máximo tempo para captar a atención do espectador e aproveitaba para pedir á mocidade que"seáis protagonistas de vuestra seguridad tanto física como virtual. Estamos aquí para ayudaros, pero los protagonistas sois vosotros".
O CPI do Toural foi escollido como sede deste acto porque o centro foi un dos dez espazos educativos de España que recibiu o premio do plan director, do mesmo xeito que dez axentes da Policía Nacional e Garda Civil do Estado e dez docentes procedentes de distintos puntos.
Estes premios concédense polo traballo desenvolvido nas aulas para formar ao alumnado ante condutas de risco para a seguridade tanto física como a través de internet.
Román Rodríguez, conselleiro de Educación, Ciencia, Universidades e Formación Profesional, tamén destacou a necesidade de fomentar a conviviencia lembrando que "todos somos iguais e á vez diferentes. O que hoxe sementamos no sistema educativo, mañá recollémolo como sociedade".
Defendeu a decisión da Xunta de Galicia de prohibir o uso de móbiles nas aulas argumentando que se detectou unha diminución de acoso escolar a través de dispositivos electrónicos e terminou facendo un chamamento aos asistentes para manter "tolerancia cero aos abusóns".
O director do CPI do Toural, Pedro Martín Méndez, recolleu o premio polo vídeo sobre acoso escolar realizado durante o curso pasado no que contaron coa participación do actor David Amor, quen tamén asistiu á entrega de galardóns.
Relacionadas:
-
"Damos o teléfono a menores e é máis perigoso que darlles as chaves do coche"
Por Mónica Patxot & Anxo Lourido |
-
"Contribuímos a proporcionar á sociedade pontevedresa a necesaria percepción de seguridade"
Por Alejandro Espiño |
-
Un de cada cinco delitos que se cometen en Galicia son telemáticos
Por Redacción |
-
A ciberdelincuencia redúcese nun 60% na provincia durante o primeiro trimestre do ano
Por Redacción |
-
Alumnado de Marcón fórmase para frear o ciberacoso e o sexting
Por Redacción |