Pecha a notaría de Pedro Riol, a de maior número de clientes de Pontevedra: como podo localizar as miñas escrituras?
Por Mónica Patxot & María José Pita
A notaría de José Pedro Riol López, despois de algo máis de dez anos na cidade de Pontevedra, na rúa García Camba, nº 14, pechaba as súas portas nos últimos días. O 26 de abril, o BOE (Boletín Oficial do Estado) publicaba a resolución "pola que se declara a xubilación forzosa do notario de Pontevedra don José Pedro Riol López".
Remataban dez anos de vinculación coa capital da provincia. O 21 de febreiro de 2014, PontevedraViva ofrecía a noticia da súa chegada a Pontevedra para ocupar a praza que deixara vacante por xubilación voluntaria Eduardo Méndez Apenela, o notario que atendía o maior volume de traballo de toda a capital.
Tamén José Pedro Riol López despedíase da cidade como o notario que máis escrituras "autorizaba" (asinaba) de Pontevedra, como confirma a este medio unha das xa ex-traballadoras da súa oficina notarial, cuxo local ultima o baleirado do mobiliario, unha imaxe que non pasou desapercibida para os viandantes.
Visiblemente afectada e renunciando a todo protagonismo, comentaba que os nove traballadores cos que contaba a notaría vanse ao paro, coa esperanza de que o novo notario ou notaria que ocupe a praza poida contar con algún deles. Todo dependerá, indicaba, de se o novo titular trae consigo ao seu equipo ou non. Cabe destacar que a empregada máis veterana da notaría de Pedro Riol levaba 40 anos traballando con este notario.
COMO PODO LOCALIZAR A MIÑA ESCRITURA?
Nos últimos días, moitos cidadáns manifestaron a súa inquietude ao atoparse co baixo que ocupaba a notaría de Pedro Riol desmantelado. A propia notaría, previo ao seu peche, foi informando a aqueles clientes que tiñan expedientes sen asinar para poder finalizar os trámites ou, no caso de que non fose posible, facilitábanlles poder dirixirse a outra notaría que se axustase aos seus intereses.
Como é lóxico, os documentos notariais asinados na notaría de Pedro Riol non se perden. Pero, como poden saber os clientes en que notaría están agora as súas escrituras?
O Colexio Notarial de Galicia ofrece na súa web unha ferramenta gratuíta, onde, introducindo tan só o nome e apelidos do notario que figura na escritura que se quere localizar e a data da mesma, o sistema ofrece os datos da notaría na que se custodia esa escritura. Este é o enderezo web onde se pode facer esta consulta: galicia.notariado.org/portal/localiza-tu-escritura.
O NOTARIO MÁS MODERNO NA PRAZA
De acordo co vixente regulamento notarial, correspóndelle ao notario Víctor Manuel Vidal Pereiro, ao ser o máis moderno na praza de Pontevedra (tomou posesión en febreiro de 2022, procedente da notaría de Nigrán e anteriormente en Castro de Rei), facerse cargo do protocolo de Pedro Riol mentres non se cobre a vacante. O protocolo sería o conxunto de documentos que custodia un notario, é propiedade do Estado, aínda que o conserva o notario.
Dende a súa oficina notarial na rúa Michelena, nº 1, Planta 1, Porta GJ, de Pontevedra, o propio Víctor Manuel Vidal Pereiro explica que o procedemento que se segue nestes casos é que, unha vez que se xubila un notario, sae o concurso publicado pola Dirección Xeral de Seguridade Xurídica e Fe Pública do Ministerio de Xustiza no que os notarios de toda España poden solicitar a praza de Pontevedra de acordo coa orde que teñen no escalafón notarial. Esa resolución publícase no BOE, dáse un prazo para impugnacións e, cando se consolida a resolución do concurso, tómase posesión por parte do novo notario.
PROTOCOLOS DENDE 1999
Non hai uns prazos fixos para que se leve a cabo este concurso, pero a estimación é que a notaría pontevedresa estará vacante entre catro e seis meses. Durante ese tempo, a notaría permanece fisicamente pechada e Víctor Manuel Vidal Pereiro custodia o protocolo non só de Pedro Riol, senón tamén o do seu antecesor Eduardo Méndez Apenela, xa que os protocolos teñen que estar en arquivo baixo chave nas notarías 25 anos e, pasado ese tempo, pasan ao Arquivo Histórico Provincial, onde hai un notario arquiveiro que é o encargado de expedir as copias dos protocolos de máis de 25 anos de antigüidade.
A efectos prácticos, as persoas que foron clientas de Pedro Riol e anteriormente de Eduardo Méndez Apenela terán que dirixirse á citada oficina notarial da rúa Michelena, nº 1, para solicitar as copias das escrituras aí arquivadas.
Con todo, Vidal Pereira puntualiza que, ao ser o protocolo secreto, non todo o mundo ten dereito a copia, senón que se examina en detalle polo notario as razóns obxectivas para pedir esta copia. Neste sentido, só ten dereito a copia o outorgante (aquel que asinou a escritura), quen acredite a súa condición de herdeiro e tamén outras persoas que a xuízo do notario teñan interese lexítimo como, por exemplo, quen adquire unha propiedade e solicita unha copia da escritura primitiva, a que asinou a persoa que lle vende esta propiedade.