Os novos xestores do Sagrado Corazón manterán o proxecto educativo "que coñece a cidade"
![Alejandro](/web/cache/scene/uploads/xornalistas/foto/dee/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/5624216432-20150128-patxot-alex-espino-002.jpg)
Por Alejandro Espiño
A partir do próximo 1 de setembro, como se anunciou hai uns días, o colexio Sagrado Corazón de Jesús de Pontevedra pasará a incorporarse á Fundación Educativa Jesuitinas, da que xa forman parte outros vinte e tres centros educativos de todo o país.
Os fundadores do colexio pontevedrés, os Misioneiros do Sagrado Corazón, apártanse da xestión do centro, segundo eles mesmos recoñeceron, para poder asegurar a continuidade deste proxecto educativo, que conta con 1.200 alumnos e preto de noventa educadores.
A presidenta do padroado da fundación, Rosa María Romo, explicou a través dunha circular que foi o pasado 20 de abril cando "tras numerosos diálogos e o estudo da documentación e dos datos" decidiron asumir a titularidade deste colexio.
Garante que o Sagrado Corazón seguirá sendo "unha oferta de educación cristiá de calidade en Pontevedra", mantendo unha traxectoria que comezou en 1956, hai xa 68 anos.
"Acollemos esta nova titularidade non cun obxectivo de crecemento, senón por ser fieis ao noso compromiso co mantemento dunha oferta de educación católica de calidade", engadiu o director xeral da Fundación Educativa Jesuitinas, José Ignacio Parajó.
Así mesmo, asegurou que "se asumirá o proxecto educativo que se estaba levando a cabo e como o coñece a cidade", subrogando a todo o persoal docente.
A este respecto, o responsable da fundación avanzou que se ofrecerá unha educación católica "na que manteremos o traballo dos misioneiros e faranse aquelas melloras que os tempos vaian esixindo para poder darlle continuidade".
O Sagrado Corazón será o cuarto colexio que a Fundación Educativa Jesuitinas xestionará en Galicia, onde xa conta con centros en Vigo, A Coruña e Noia.