Trece días de obras para converter o Paseo de Silgar en plataforma única
Por Redacción
Un equipo de cincuenta persoas traballarán de luns a sábado, en dúas quendas, para completar canto antes as obras que converterán o Paseo de Silgar nun vial con plataforma única.
Os operarios de Construcións Castro Figueiro, que se adxudicou estes traballos por 626.919 euros, terán trece días para executar esta actuación.
A provisión do material e da maquinaria necesaria para a obra xa comezou este xoves.
En paralelo, a Policía Local elaborou un dispositivo de tráfico para a entrada ao centro do municipio aínda que se recomenda evitar, na medida do posible, o acceso rodado á zona durante a obra.
Desde este luns 3 de xuño, o aparcadoiro de Nauta permanecerá pechado.
Esta actuación, que busca dar prioridade aos desprazamentos a pé e mellorar a accesibilidade e a seguridade viaria, abarcará desde o cruzamento da Rúa Ourense ata a intersección coa Rúa Cesteiros, incluído un tramo da Rúa do Porto.
En todo este tramo habilitarase unha plataforma única en lastra que terá unha superficie de 4.783 metros cadrados.
A área de acceso rodado executarase cun cambio de pavimento, con lastra coloreada, para unha mellor visibilidade para o condutor e o peón.
No encontro entre este e as beirarrúas colocarase unha rigola acanalada para favorecer a recollida de augas pluviais e facilitar a súa rápida evacuación.
O proxecto incluirá a renovación da rede de saneamento e unha nova iluminación pública, cambiando farois e luminarias por outras máis eficientes.
Relacionadas:
-
A Rúa Madrid estrea novos farois e o entroque de Vidal Rocha e Paseo de Silgar, zona axardinada
Por Oskar Viéitez |
-
A plataforma única de Silgar estará rematada este venres cun total de 144.000 lastras azuis
Por Oskar Viéitez |
-
O Paseo de Silgar e a Rúa Madrid terán plataforma única e prioridade peonil
Por Redacción |
-
Queixas polo deterioro da principal vía de acceso ao Porto Deportivo de Sanxenxo
Por Oskar Viéitez |