O arquitecto Luis Gil Pita dará as claves para reestruturar unha vivenda unifamiliar pontevedresa
Por Redacción
A Delegación de Pontevedra do Colexio de Arquitectos de Galicia (COAG) programa para este luns 27 de maio un novo acto dentro do ciclo 'Visitando GDA (2023)', en relación coas obras destacadas nos Premios Gran de Area do ano pasado na área da cidade.
Nesta ocasión, o arquitecto Luis Gil Pita, analizará os detalles do proxecto sobre a reestruturación dunha vivenda unifamiliar no centro histórico de Pontevedra.
Esta vivenda tradicional foi premiada polo certame Gran de Area ao transformar o espazo en algo novo sen afectar o volume orixinal, co emprego de sistemas construtivos tradicionais en madeira, adaptados ás técnicas actuais cunha proposta interior contemporánea que vira arredor dunha árbore de aceiro, segundo explican desde o COAG.
A conferencia desenvolverase a partir das 19.00 horas na Casa das Campás, na rúa Don Filiberto.
A charla é aberta ao público pero precísase confirmar a asistencia a través desta ligazón.
O prazo para inscribirse permanecerá aberto ata o mediodía deste luns 27.