Temor ante o risco de derrubamento do cruceiro de San Amaro tras un novo impacto dun coche
Por María José Pita
O suceso ocorría o venres 24 de maio. A Policía Local de Pontevedra recibía aviso de que o cruceiro de San Amaro estaba desprazado na súa base e que a parte superior do fuste estaba partida, con risco de que o capitel e a cruz viñesen abaixo. Dada a entidade dos danos, procederon a avisar aos servizos técnicos para que valasen a zona.
Segundo diversas fontes consultadas por PontevedraViva, sinalan que a desfeita se debeu á acción dun coche que impactou contra o cruceiro, cuxo condutor, a falta de confirmación oficial, abandonaría a zona sen poder ser identificado.
Esta incidencia prodúcese sete meses despois de que este elemento patrimonial fose reposto na praza de San Amaro, lugar do que foi retirado en 2010, cando un vehículo provocou o derrube do fuste, capitel e a cruz.
No caso do venres, a estrutura cedeu na base do capitel pero, aparentemente, a cruz e as imaxes de Cristo crucificado e a Virxe das Angustias salváronse. Todos estes elementos foron apontoados e a veciñanza agarda que este luns procedan a unha avaliación das actuacións que haberá que realizar.
Eulogio Sartier, o presidente da asociación de veciños Moldes-Mourente, manifestaba a súa indignación ante este novo episodio. "Levamos meses avisando e nada". Durante a xornada do sábado, Sartier desprazouse ata a sede da Policía Local para solicitar que se puidese retirar a cruz superior porque "se vén vento vai caer abaixo e vaise a romper en corenta anacos".
O colectivo veciñal leva meses reclamando o cambio da localización do cruceiro, xa que se atopa nun punto por onde circulan os vehículos que aparcan na praza de San Amaro. Demandan que se devolva ao lugar máis próximo á capela de San Amaro, onde estaba asentado ata o incidente de 2010, e que se estableza unha zona de protección ao redor para evitar accidentes.
Desde novembro de 2023 rexistráronse tres incidentes de importancia por impactos coa base do cruceiro, que provocaron o seu desprazamento e ameaza á estabilidade de todo o conxunto patrimonial.
Relacionadas:
-
Apontoan o cruceiro de San Amaro, "a piques de caer", mentres os veciños reclaman un cambio de localización
Por Natalia Puga |
-
O cruceiro de San Amaro, de novo danado polo impacto dun coche (e os veciños xa perderon a conta)
Por Natalia Puga |
-
Alerta por un desprazamento do cruceiro de San Amaro: "Puido ser unha furgoneta porque o pedestal pesa"
Por Mónica Patxot & María José Pita |
-
O Arcebispado confirma a súa intención de pechar ao tráfico unha parte do atrio da capela de San Mauro
Por Manu Otero |
-
Os veciños de San Mauro están en pé de guerra contra o peche ao aparcamento do adro da capela
Por Manu Otero |
-
Marea pide devolver o cruceiro de San Amaro ao seu lugar orixinal
Por Redacción |