Un de cada catro mozos en Galicia di ser incapaz de falar en galego
Por Oskar Viéitez
A plataforma cidadá, da que forman parte case 600 entidades, Queremos Galego celebrou este venres 17 de maio, Día das Letras Galegas, unha manifestación polas rúas de Santiago de Compostela baixo o lema 'Galego vivo, Galiza viva'
Este 2024 cumpriranse 20 anos da aprobación por unanimidade parlamentaria do Plan Xeral de Normalización da lingua galega, elaborado no seu momento coa participación de máis de 1.000 persoas e con 400 accións e medidas concretas en diversos lugares de Galicia. A realidade, sinalan desde a plataforma, é que "este plan non só non se desenvolveu, senón que se foron producindo importantes retrocesos".
O voceiro da plataforma e autor dos Bolechas, Pepe Carreiro, sinalou que "é hora de que o Goberno galego actúe con responsabilidade e cumpra as súas obrigas executando as máis de 400 medidas aprobadas no Plan Xeral de Normalización para facer do galego unha lingua útil e viva".
Dende a plataforma trasladaron así a "preocupación social" polo datos que alertan de que o 24% das mozas e mozos de Galiza séntense incapaces de falar en galego.
Para reverter esta situación, demandaron que "o galego estea vivo no ensino para garantir a competencia na nosa lingua e incorporar novos falantes", para o que volveron esixir a derrogación do Decreto 79/2010 por impoñer un "modelo desgaleguizador". Na mesma liña, reivindicaron un galego vivo no audiovisual asegurando acceso a debuxos animados en galego para el público infantil, tal como reclama a Iniciativa Xabarín.
Queremos Galego lamenta de igual xeito a dificultade de vivir hoxe plenamente en galego. Por este motivo, instan a garantir que a nosa lingua sexa sempre unha alternativa na relación coas diferentes administracións, nos servizos públicos como a sanidade e a xustiza, e tamén nas relacións e na información comercial.
Dende Queremos Galego defenden tamén a necesidade de respectar a toponimia galega, "a única legalmente válida".
Marcos Maceira, presidente da Mesa pola Normalización Lingüítica citou algúns exemplos do panorama actual sobre a lingua como "a desaparición do galego nas escolas infantís, as dificuldades para as aulas en galego con EDIXGAL, a ausencia de contidos audiovisuais infantís -incumprindo a lei- en RTVE, o acceso ás webs da administración por defecto en castelán, os servizos que non entenden nin atenden en galego" e "a nova vaga de deturpación da toponimia". "O resultado de todos estes obstáculos", advirte Maceira, "é o descenso de falantes".
Relacionadas:
-
Migallas Teatro convida a reflexionar sobre o presente e o futuro da lingua con 'Falemos como galegas'
Por Redacción |
-
Xogos populares, animación e música para prorrogar a celebración das Letras Galegas
Por Redacción & Cristina Saiz |
-
Un día para reafirmar o compromiso coa lingua e cultura galegas
Por Redacción |
-
Invitación a usar o galego como vehículo de unión
Por Mónica Patxot & Anxo Lourido |
-
Espectáculos musicais, títeres e contacontos difunden as Letras Galegas en Vilaboa
Por Redacción |
-
Recital 'A outra Patria' na UNED para conmemorar o Día das Letras Galegas
Por Redacción |
-
Tres días para gozar das Letras Galegas no Centro Cultural Xaime Illa
Por Anxo Lourido |
-
Francisco Javier Fernández Davila, gañador do XXII Premio de Poesía Concello de Marín
Por Redacción |
-
A Pedreira celebrará dúas xornadas de Festa da Lingua para sementar futuro
Por Mónica Patxot & Anxo Lourido |