A Pedreira celebrará dúas xornadas de Festa da Lingua para sementar futuro
Por Mónica Patxot & Anxo Lourido
A Asociación Cultural A Pedreira, coa colaboración do Concello de Pontevedra, organiza para o venres 17 e o sábado 18 diversas actividades coa finalidade da fomentar a lingua, principalmente entre público infantil e adolescente.
Xiana Rodríguez, Roi Redondo e Borxa Mexuto, representantes do colectivo, presentaban este luns xunto ao concelleiro de Cultura, Demetrio Gómez, as propostas lúdico e culturais da Festa da Lingua para estes dous días.
As actividades comezarán o venres 17 ás 20.30 horas na praza da Peregrina cunha ruada lúdico reivindicativa polas rúas de Pontevedra coa participación da banda de gaitas Polavila.
A continuación, xa na praza da Pedreira, comezarán os concertos de Os Vacalouras, con rock irreverente, e de Catuxa Salom, que fusiona raíz galega e de América do Sur.
Na xornada do domingo van desenvolverse actividades familiares e infantís na Rúa Serra, nos arredores do local social, con xogos populares a cargo de Sororas a partir das 11.00 horas.
Tamén vai poñerse en marcha unha actividade denominada "libros viaxeiros", onde a intención é liberar libros polas rúas para que as persoas os recollan e poidan trasladalos a outras vilas e cidades. A idea é que a través dunha páxina web se poida ver cara onde viaxou o libro pasando de man en man.
Ás 12.00 horas actuará o paiaso Peter Punk co espectáculo 'Peor impossível' para despois dar paso á foliada coa banda de gaitas Foula. Todas estas propostas son gratuítas e abertas ao público.
Como fin de festa haberá un xantar popular para o que é preciso inscribirse no correo apedreira@riseup.net ou no teléfono 601.981.288.
Os prezos desta comida son de 15 euros para persoas a partir de 17 anos; 10 euros para adolescentes e gratuíto para público infantil.
O menú contará con varios petiscos, empanada de polbo e ensaladilla rusa, raxo de porco ao forno con mollo de mazá, e biscoitos variados de sobremesa. Tamén haberá un menú para persoas veganas.
Este xantar popular contou con máis dun cento de participantes na edición de 2023.
Roi Redondo invitaba á participación da cidadanía nestas actividades para fomentar a transmisión da lingua, coidala e defendela para que "leve a mil primaveras máis", seguindo o lema da Festa: "sementando futuro".
Relacionadas:
-
Xogos populares, animación e música para prorrogar a celebración das Letras Galegas
Por Redacción & Cristina Saiz |
-
Un de cada catro mozos en Galicia di ser incapaz de falar en galego
Por Oskar Viéitez |
-
A Festa da Lingua cambia de localización pola choiva
Por Redacción |
-
Espectáculos musicais, títeres e contacontos difunden as Letras Galegas en Vilaboa
Por Redacción |
-
Recital 'A outra Patria' na UNED para conmemorar o Día das Letras Galegas
Por Redacción |
-
1.300 escolares participarán no Correlingua pontevedrés á voz de "dende aquí até acolá, Galego xa!"
Por Mónica Patxot & Anxo Lourido |
-
'O Diamante Galego' inicia un ciclo de actividades no Centro Social A Pedreira
Por Anxo Lourido |
-
As letras galegas florecen en cada recuncho da Boa Vila este mes de maio
Por Oskar Viéitez |