Unha ameixa xigante de catro quilos revoluciona Campelo: "Pensei que era unha tartaruga"
Por Natalia Puga
A sorpresa foi maiúscula para Rogelio Bellón o mércores en Campelo. Propietario de Delicatessen da Ría, para el traballan varios mergulladores aos que compra navallas e ese día un deles saíu ao seu encontro cunha peza xigante na man. Logo sabería que era unha ameixa de catro quilos de peso e 35 centímetros de longo, pero naquel momento figurouse algo moi diferente. "Pensei que era unha tartaruga".
Os mergulladores non adoitan coller este tipo de exemplares, que non se poden comercializar porque carecen de plan de explotación, pero nesta ocasión fixeron unha excepción porque "chamoulles a atención e trouxérona para que o biólogo de Campelo a vise".
E, xa en terra, non lles faltaron espectadores. O primeiro en vela foi Rogelio e depositouna no acuario da lonxa de Campelo. Alí, causou sensación. Realizaron fotos e vídeos e a súa historia empezou a circular por todo o sector durante toda a xornada que permaneceu alí.
Este xoves, tras un día sendo a protagonista, esta ameixa regresou ao mar, pois este tipo de exemplares non se poden capturar nin comercializar e o seu destino é sempre regresa ao lugar do que saíu. Non puideron esperar máis días porque, co festivo e a fin de semana, supoñería mantela moito tempo no acuario da lonxa e sería malo para o exemplar.
Neste caso, foi localizada nun punto entre a illa de Tambo e Raxó, en Poio. Os mergulladores da navalla estaban a traballar cando pasou un barco e "levantouna".
Segundo relata Rogelio, estaba a metro e medio de profundidade e, tras o paso do barco, "removeu a zona do leito mariño" e o mergullador en cuestión viu un bulebule, achegouse, meteu a man e tocouna.
Tivo que acabar usando as dúas mans para sacala da area, tirou cara arriba da carne e sorprendeuse do tamaño. Non era a primeira vez que atopaba unha ameixa xigante, pero nunca deste tamaño.
En contra do que poida parecer, "non é a primeira vez que atopamos este tipo de ameixas, é habitual", sobre todo na zona dos Praceres, en Lourizán, pero "tan grande nunca a vía". Así, o habitual é que sexan exemplares de 1,1 ou 1,2 quilos. Ata 1,8 xa sabían que apareceran, pero "de catro quilos, como esta, nunca".
Este tipo de ameixas ten moita saída en China ou Xapón, onde chegan a pagarse 100 euros o quilo, pero non saen de Galicia, pois aquí a súa extracción non está permitida. Noutros países, si.