As praias do Lérez e Ponte Sampaio terán socorrista a diario de 13.00 a 20.30 horas
![Natalia](/web/cache/scene/uploads/xornalistas/foto/9b5/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/577f8fbb69-hkm23_ri.jpg)
Por Natalia Puga
As praias fluviais do Lérez en Pontevedra e do Verdugo en Ponte Sampaio terán servizo de socorrismo durante este verán a diario de 13.00 a 20.30 horas, cun socorrista de luns a venres e un reforzo de dous durante as tardes da fin de semana, de 16.30 a 20.30 horas.
O servizo prestarao a empresa Salvar Formar y Socorrer, dedicada á prestación de servizos de socorrismo e formación, que resultou adxudicataria do concurso convocado polo Concello de Pontevedra.
O Concello sacou a licitación, por primeira vez, un contrato para a xestión e coordinación do servizo de socorrismo nas dúas praias e a Xunta de Goberno deste xoves aprobou a adxudicación por 44.762 euros anuais. O contrato será por dous anos con opción de prórroga outros dous anos.
Os socorristas atenderán as praias fluviais entre o 1 de xullo e o 31 de agosto.
A tenente de alcalde de Pontevedra, Eva Vilaverde, anunciou a adxudicación e explicou que os socorristas terán entre as súas funcións a vixilancia dos areais, información aos usuarios, a comunicación coa Policía Local e a colocación de balizamentos e bandeiras.
LICENZA PARA O FROEBEL
Na Xunta de Goberno deste xoves tamén se acordou conceder unha prórroga para o prazo de finalización da terceira fase das obras do colexio Froebel.
Tal e como explicou Vilaverde, en 2011 concedeuse licenza para a execución das obras neste colexio en tres fases. Agora, prorrógase licenza para esa terceira fase cunhas modificacións, un trámite administrativo cuxa importancia radica en que supón xa finalizar a mellora deste centro educativo do centro da cidade.
Relacionadas:
-
O mapa de zonas de baño de Galicia sinala como non aptas 39 praias
Por Oskar Viéitez |
-
Haberá socorristas nas dúas praias fluviais de Pontevedra en xullo e agosto
Por Alejandro Espiño |
-
A praia fluvial de Monte Porreiro e a de Ponte Sampaio contarán con servizo de socorristas até o 31 de agosto
Por Redacción |
-
Posta a punto da praia fluvial do Lérez ante a chegada da calor
Por Redacción |