O desdobramento da Avenida de Vigo, listo para a súa licitación
Por Alejandro Espiño
Unha Xunta de Goberno extraordinaria deu este venres luz verde ao comezo do proceso de licitación do proxecto coñecido como o desdobramento da Avenida de Vigo, a obra "máis importante e ambiciosa" deste mandato municipal, reiterou o concelleiro Luís Bará. Investiranse en total 4.156.055 euros, que se repartirán en dúas anualidades: 2.156.055 euros en 2014 e os restantes dous millóns de euros en 2015.
As condicións de licitación publicaranse nos próximos días tanto no Diario Oficial de Galicia (DOG) e no Boletín Oficial da Provincia (BOP), un trámite que se realizará pola vía de urxencia. A partir de aí as empresas terán 26 días para presentar as ofertas que, posteriormente, serán analizadas pola mesa de contratación. Trátase dun trámite que será máis arduo do habitual, xa que se prevé a concurrencia de numerosas empresas. A gañadora contará ademais cun mes para presentar o proxecto definitivo.
Malia a tramitación "bastante complexa" desta actuación "moi esperada", segundo Luís Bará, o goberno municipal confía cumprir os prazos marcados e que a obra poida ser adxudicada antes do verán. "Poñeremos toda a carne no asador", sinalou, para que xa durante os meses estivais a empresa adxudicataria comece cos movementos de terra e a explanación dos terreos, así como coa reforma da Avenida da Estación.
O desdobramento da Avenida de Vigo e a mellora de toda a súa contorna supoñerá, segundo o concelleiro nacionalista, unha "transformación global e moi positiva" para toda a zona. Por iso é polo que o Concello de Pontevedra queira dar ao novo vial un nome acorde a esta importancia. Bará sinalou que "estamos a recibir propostas de denominación para o novo vial", e non se descarta bautizala co nome dunha persoa, unha opción pouco explorada polo goberno local.
Antes de todo iso, con todo, o goberno municipal volverá convocar aos veciños para explicarlles de novo o estado de tramitación do proxecto e seguir recollendo posibles suxestións. Será despois do entroido no IES Torrente Ballester.
Relacionadas:
-
As obras de desdobramento da Avenida de Vigo xa teñen data: empezarán o 25 de agosto
Por Redacción |
-
COVSA, Eiriña, Ferrovial e Dragados, 'favoritas' para executar o desdobramento da Avenida de Vigo
Por Alejandro Espiño |
-
A "gran transformación urbana" da contorna da Avenida de Vigo será adxudicada "antes do verán"
Por Alejandro Espiño |
-
Desdobrar a Avenida de Vigo, a obra "máis ambiciosa da década", permitirá unha "total transformación" da zona
Por Alejandro Espiño |