O CEIP de Cabanas - Salcedo triunfa no 40 Concurso Escolar da ONCE en Galicia
Por Redacción
Os colexios CEIP de Cabanas, Salcedo (Pontevedra), CEIP de Castrelo de Miño (Ourense) e CPI As Mirandas, Ares (A Coruña) foron seleccionados como gañadores de Galicia no 40 Concurso Escolar do Grupo Social ONCE.
O certame consistía en que docentes e estudantes elaborasen un 'Inclusionario', un dicionario co obxectivo de ser o máis democrático e inclusivo da historia ao converterse no primeiro con palabras que definen a importancia da inclusión das persoas con discapacidade na sociedade.
O centro escolar pontevedrés lograba este éxito nun concurso que contou coa participación de 5.167 escolares de 63 centros educativos de Galicia.
Os participantes tiñan que ofrecer unha palabra e o seu significado nun cartel creativo. No proceso podían escribir a palabra a modo de lettering (debuxando artisticamente as letras), ou mesmo como nalgúns dicionarios, elaborando un debuxo que acompañe á palabra e que axude a apoiar a súa definición.
Para realizar as creacións, o persoal docente dispoñía de material didáctico en liña, elaborado por persoas expertas en inclusión e tamén na utilización de palabras.
Os grupos vencedores nesta fase autonómica terán a oportunidade de gozar dunha experiencia para a aula valorada en 500 euros, segundo a ONCE. Docentes e alumnado recibirán unha tablet para seguir aprendendo sobre a historia da inclusión.
Agora, no ámbito estatal do concurso, máis de 146.000 estudantes axudarán a crear o 'Inclusionario' coas súas achegas de ideas e reflexións para impulsar a inclusión.