Novos proxectos para aparcar de xeito accesible na contorna comercial de Cuntis e Campo Lameiro
Por Redacción
A Deputación de Pontevedra vai contratar a instalación de prazas de aparcamento reservadas e accesibles na contorna comercial dos concellos de Cuntis e Campo Lameiro ao abeiro do proxecto “Da túa man” (rural II).
O programa busca servir de apoio á actividade comercial a hostaleira local do rural da provincia e asegurar que os municipios conten con estacionamentos específicos para persoas con discapacidade, debidamente sinalizados e co tamaño adecuado.
Ademais, contemplase embelecer a zona comercial con xardineiras, o que axudará ás persoas con discapacidade visual a orientarse na área.
En Cuntis, o programa conta cun orzamento de 5.784 euros. Dotarase de accesibilidade a unha praza de aparcamento en liña situada na rúa Don Aurelio, e incluiranse seis xardineiras en liña na beirarrúa contigua á praza como elementos para delimitar e embelecer a zona comercial.
En Campo Lameiro, vanse investir 3.700 euros e dotarase de accesibilidade a unha praza de aparcamento en liña xa existente na estrada de Codeseda á altura da Praza Campo da Feira. Ademais, incluiranse tres xardineiras como elementos para delimitar e embelecer a zona comercial ao comezo de dita estrada, na contorna dos lavadoiros próximos á panadería e á farmacia.
A Deputación vai destinar 50.000 euros a Cuntis, Arbo, Campo Lameiro, Forcarei, Meis, Mondariz, As Neves, Pontecesures e Rodeiro con cargo aos fondos Next Generation.