Atunlo anuncia o despedimento colectivo na súa planta no Grove
Por Oskar Viéitez
A conserveira Atunes y Lomos (Atunlo) anunciou o despedimento colectivo na planta do Grove na que traballan unhas 130 persoas.
A consultora Deloitte deseñou este plan de axuste de Atunlo, o maior operador de atún de España, xustificando a decisión en causas obxectivas de natureza económica e produtiva.
O inicio deste expediente de regulación de emprego (ERE) extintivo tamén afecta á planta que Atunlo ten na localidade cántabra de Santoña.
A empresa entrou en preconcurso de acredores o pasado mes de novembro pero a decisión foi toda unha sorpresa para os traballadores.
A comisión negociadora reunirase a próxima semana e Atunlo manifesta a súa "firme e inequívoca vontade" de que o período de consultas se desenvolva "nas mellores condicións e se atope presidida pola boa fe, a máxima transparencia e o espírito construtivo", co obxectivo de alcanzar un acordo entre as partes.
Atunlo tamén ten plantas en Cambados e en Vigo.