Como certificar os valores inmateriais e espirituais dos bosques
Por Oskar Viéitez
A conservación dos bosques implica numerosos beneficios como a súa contribución á mitigación dos efectos do cambio climático e á preservación da biodiversidade, a produción de madeira e doutra serie de produtos, pero tamén hai outros rendementos de carácter inmaterial, como aqueles ligados ao ocio e benestar do ser humano.
Na Escola de Enxeñaría Forestal están a traballar no desenvolvemento dunha metodoloxía dirixida a certificar eses valores inmateriais ou espirituais ligados aos bosques, que tratarán de poñer a proba en masas forestais ligadas ao Camiño de Santiago.
O investigador principal do grupo AF-4, Enrique Valero, explica que con este traballo "trátase de conseguir nun futuro unha certificación forestal dos bens inmateriais e intanxibles dos bosques".
Valero incide no novidoso dunha proposta que toma como punto de partida os Criterios da Xestión Forestal Sostible, definidos na conferencia interministerial de Helsinki. "Será a primeira vez que se intentan conseguir indicadores de sostibilidade ligados a aspectos inmateriais, pero si apreciables, tales como benestar, saúde, espiritualidade, valor experiencial, calidade estética e outros relacionados coa experiencia perceptiva e emocional", destaca.
Para iso será necesario definir un conxunto de indicadores que permitan avaliar se unha masa forestal ou un tramo de bosque cumpren unha serie de criterios que permitan recoñecelos "como de excelencia" a través dunha certificación, do mesmo xeito que outros produtos derivados dos bosques son recoñecidos con certificacións como PEFC.