Pontevedra segue a ser a poboación máis nova de Galicia
Por Oskar Viéitez
Pontevedra segue sendo a poboación máis nova de Galicia. A idade media da poboación está en 45 anos. Estes son datos recolleitos no Informe nº 8 do Observatorio económico e social de Pontevedra 2022, elaborado pola Asociación Pont Up Store e solicitados de fontes oficiais.
O alcalde de Pontevedra, Miguel Anxo Fernández Lores, compareceu este martes en rolda de prensa para presentar os resultados deste traballo que compara as sete grandes cidades galegas (A Coruña, Lugo, Ourense, Santiago, Vigo, Ferrol e Pontevedra).
Segundo resumiu, este último informe reflicte que "Pontevedra é unha cidade dinámica, tanto do punto de vista de poboación como social", sinalou Lores.
O alcalde destacou os que para el son os datos máis importantes deste informe que reflicten que Pontevedra é o municipio que ten máis persoas de ata 20 anos e menos maiores de 65 anos. Esta é unha das variables na que destaca a capital do Lérez e que se mantén ano tras ano. Pontevedra ocupa a sexta posición segundo o número de habitantes das sete cidades de Galicia.
Lores tamén incidiu na estrutura dos fogares da Boa Vila, xa que é a cidade onde máis persoas hai por fogar (2,62), onde a composición é máis nova (os fogares con menores de 16 anos alcanzan o 29,64%) e onde o número fogares unipersoais é máis baixo (21,19%) o que representa unha menor probabilidade de situación de soidade. Tamén é relevante que é a segunda cidade onde a persoa sustentadora principal do fogar é máis novo (55,19 anos).
Para o alcalde da capital, hai outras dúas conclusións destacables que mostra este informe: unha é que Pontevedra é unha das cidades que menos empresas perdeu tras a pandemia e na que máis empresas mantiveron a súa actividade e a outra é que "somos a cidade que ten menos fogares que chegan con gran dificultade a final de mes", un 6,14%.
"Somos a cidade que ten menos fogares que chegan con gran dificultade a final de mes"
É relevante que Pontevedra, entre as 7 grandes cidades de Galicia, sexa onde é máis baixo a porcentaxe de poboación en risco de pobreza cun 13,93% (segundo o sistema de indicadores da Estratexia Europa que o fai comparable a nivel de toda a Unión Europea).
Pero Pontevedra tamén destaca en negativo por ser a cidade, das 7 contempladas, con peor cociente de entidades prestadoras de servizos sociais por cada 1.000 habitantes.
Este informe é froito do tratamento de 1.624.783 valores que fan referencia fundamentalmente ao ano 2022, aínda que existen casos en que o último dato dispoñible é 2021.
Relacionadas:
-
Aprobar a nova RPT municipal, segundo Lores, obrigaría a subir os impostos: "Non é asumible"
Por Alejandro Espiño |
-
O Goberno local impulsa uns orzamentos para 2024 "adaptados á inflación, os xuros e os custos de persoal"
Por Natalia Puga |
-
A construción en Pontevedra mantén a súa actividade estable mentres os orzamentos dispáranse
Por Oskar Viéitez |