Louzán admite que o Goberno "non tomou a mellor decisión" e móstrase disposto a devolver a paga extra
Por Oskar Viéitez
O presidente da Deputación de Pontevedra, Rafael Louzán, está decidido aboar a paga extra de Nadal de 2012 aos seus funcionarios tras admitir que o Goberno "non tomou a mellor decisión". A resolución de devolver a extra de 2012 foi abordada esta mañá cos servizos técnicos da institución provincial, e está pendente dun informe de intervención.
Louzán anunciou esta decisión tras entrevistarse con Miguel Borra, presidente nacional de CSIF, que acudiu á reunión acompañado polos responsables deste sindicato en Galicia e na provincia de Pontevedra.
O encontro, que estaba previsto dende hai varios días, coincidiu coa publicación da sentenza do Xulgado do Social número tres de Pontevedra que recoñeceu este luns o dereito de 135 traballadores laborais do ente provincial a percibir a extra de decembro de 2012 na contía que corresponda sobre a base dos servizos prestados polo período percibido do 1 de xaneiro ao 14 de xullo daquel ano.
O xulgado decretou o aboamento tras aceptar unha demanda dos sindicatos CSIF, CC OO, UGT e CIG.
Respecto ao resto de funcionarios, máis de setecentos, Rafael Louzán recoñeceu que "quedan nunha situación diferente ao resto de laborais", e asume "que non deberían quedar fora", polo que entende que "hai que recoñecer que a decisión non foi ben tomada no seu momento".
"Temos que respectar, e eu o primeiro, as decisións tomadas polo Goberno, pero pódese comprobar con esta sentenza que non se tomou a decisión do mellor xeito posible", admitiu o mandatario popular "porque senón, non se entende que estean saíndo unha tras outra sentenzas favorables aos intereses dos traballadores", engadiu.
Aínda que o fallo, é recorrible ante o Tribunal Superior de Xustiza de Galicia, o presidente da Deputación acatará a sentenza e admitiu sentilo polos traballadores "dende esta institución hai unha satisfacción xeneralizada polo seu traballo".
Louzán: "hai que recoñecer que a decisión non foi ben tomada no seu momento"
Neste sentido Rafael Louzán non seguirá o exemplo do presidente da Xunta, Alberto Núñez Feijóo, quen asegurou a semana pasada que a administración autonómica aboará aos seus empregados a paga extra suprimida polo Goberno cando haxa "unha sentenza firme que o demande".
Precisamente esta era unha das cuestións que lle trasladou o presidente nacional de CSIF, Miguel Borra, polo que saíu satisfeito do encontro co presidente da Deputación. Ademais compartiu a preocupación por se a reforma da lei de bases de réxime local realiza "a costa de la privatización de servicios esenciales, el recorte en las condiciones de trabajo de los empleados públicos y, en el peor de los casos, la amortización de plazas o el despido de personal".
Así mesmo, sinalou que espera que os empregados públicos e os cidadáns non teñan que pagar "los platos rotos" da reforma "a través de despidos y privatizaciones".
Borra acudirá este martes á empresa ENCE para trasladar o seu apoio aos representantes do CSIF no comité de traballadores desta firma pastera de cara ás eleccións sindicais que se celebrarán nas próximas semanas.
Relacionadas:
-
Os funcionarios da Deputación non cobrarán a parte proporcional da 'extra' de 2012... de momento
Por Redacción |
-
Os funcionarios municipais de Pontevedra poderían cobrar ata tres veces a extra de decembro
Por Oskar Viéitez |
-
Unha sentenza concede aos empregados da Deputación a parte proporcional da paga extra de 2012
Por Redacción |