Descobren cinco novas estacións de arte rupestre en Campo Lameiro
Por Redacción
Membros da asociación O Eido do Cervo descubriron de maneira casual cinco novas estacións de arte rupestre en Campo Lameiro, descoñecidas ata o momento, cuxa aparición notificaron a Patrimonio da Xunta.
O achado produciuse durante o deseño e sinalización do circuíto dunha carreira de montaña, o Trail do Cervo, que se celebrará o próximo 9 de decembro.
"Estabamos a preparar o percorrido e levámonos unha sorpresa ao atoparnos con estes cinco petróglifos que non se coñecían", explicou Manuel Abalo, bombeiro forestal de profesión e apaixonado da arte rupestre galega.
Tras atopar estas laxas, os seus descubridores comprobaron que non constaban nos rexistros da Xunta e que, por tanto, "son bens arqueolóxicos inéditos que deben de inventariarse para poder ser protexidos", segundo subliña Abalo.
Estas manifestacións de arte rupestre apareceron nos montes das aldeas de Alende, Lamosa e Painceiros, sendo nesta última onde estaban as máis interesantes.
Unha delas mostra un único cervo co pescozo completamente erguido en actitude típica de brama, probablemente un macho novo pola súa escasa cornamenta; e a outra ten un conxunto de círculos concéntricos agrupados, algúns de bo tamaño e certa complexidade.
Na aldea de Lamosa apareceron dúas pedras máis con círculos concéntricos e o quinto achado, en Alende, estaba preto dun camiño polo que pasarán os corredores deste trail.
"O caso de Campo Lameiro e concellos limítrofes é algo excepcional no mundo da arte rupestre, un valor que teriamos que protexer e coidar pois é unha manifestación cultural que chegou ata nós desde a prehistoria", aseguran desde este colectivo.