Miguel Alberte Melero volve poñerse diante dos micrófonos de PontevedraViva Radio. En agosto de 2018 gravaba un dos podcast de 'A playlist de...'. Naquela ocasión este mozo pontevedrés contounos que reside en Barcelona, que é graduado en Tradución e Interpretación e deducimos que, aínda que non hai un título académico oficial, é doutoramento honoris causa en Beatlemanía.
E por este camiño volve a este 'Cara a cara' para que nos avance como está a súa traxectoria como músico, semi profesional di el.
Un primeiro avance: desde este pasado domingo 26 de maio ata o sete de xuño viaxará por Alemaña, Francia, Eslovaquia e Hungría para ofrecer varios concertos co seu directos tributo a George Harrison e a Eric Clapton.
Xa no mes de agosto, entre o 21 e o 27, actuará naInternational Beatle Week que se celebra anualmente en Liverpool. Unha convocatoria que lle xurdiu en Sevilla durante un directo. Fixouse neste pontevedrés Julia Baird.
Para a inmensa maioría dos mortais o nome pasa desapercibido, pero entre quen sexa adepto a The Beatles, será máis fáctil saber que é a irmá de John Lennon. Non é a primeira persoa desta cidade que toma parte no evento, lembra Miguel, xa que a guitarrista pontevedresa Laura Solla xa participou coa súa banda hai uns anos.
Naquela actuación sevillana tamén tivo ocasión de coñecer a outra muller vinculada a George Harrison e a Eric Clapton, a icónica modelo Pattie Boyd, quen estivo casada con ambos. Para o imaxinario musical colectivo cabe dicir que foi quen inspirou cancións como 'Layla'.
A finais de 2019 publicou o seu segundo EP co nome de 'Rúa Arcebispo Malvar' cunha portada que simula a mítica en Abbey Road e tras varios singles, en 2023 publicou o terceiro, 'Amor', a modo do "disco branco" dos Beatles. En Barcelona formou unha banda, Miguel Alberte Trío coa que tocan rock and roll, pop e blues.
Todos os detalles deses concertos e tributos están neste podcast aloxado na web dePontevedraViva Radio, para escoita e descarga. Tamén se pode escoitar desde a ligazón que se adxunta.