Andrés Núñez Rajoy
A que montou Amalec, ou foi Iavé?
Repaso estes días o acontecido en Palestina xa que non lle vexo solución posible. Co que está pasando ca rapazada gazatí o mundo occidental segue impasible. Lendo artigos e crónicas dos derradeiros oito meses atópome cunha frase de Netanyahu, pronunciada o 28 de outubro de 2023, que espertou o meu interese. Nunha mensaxe á nación dicía: “Lembrade o que vos fixo Amalec”. Este nome soábame a algo. A que? Á Biblia. Teño formación relixiosa católica. De pequeno tiven que acudir á cataquese porque un cura daquela era moito máis que un cura de hoxe. Daba, ao igual que a Garda Civil, o certificado de boa conducta que era fundamental para poder traballar na administración, poder ir a Portugal a por café ou, o máis importante, emigrar. A rapazada toda íamos á cataquese non vaia ser que fixera falta a sinatura de D. Juan. Era moi esixente co coñecemento da Biblia. Tamén tiven sacerdotes no bacharelato que nos comentaban a Biblia, ata que me confirmou o cardeal Quiroga Palacios, a partir de aí foi baixando o meu interese. Mais todo isto, aínda que agora non crea é formación que me valeu para lembrarme de Amalec. Asociei o nome co éxodo dos israelitas de Exipto, comandados por Moisés. Debo sinalar que o Deus, ou Iavé, ou Señor do Antigo Testamento tiña moita xenreira. Descríbese coma un ser cabreado co mundo, sobre todo cando as cousas non ían como el quería. É moi celoso, rancoroso, autoritario, mais onde destaca é na súa crueldade antolladiza, onde o que menos lle importa é a vida das persoas. O máis paradoxal é isto que describín non só llo fai aos inimigos dos seus senon que llo fai aos seus propios, lembremos o de Abraham cando lle di que sacrifique ao seu fillo Isaac. Este Iavé é ao que lle tiñan que admitir polbo como animal de compañía.
Fun a Biblia Galega (www.abibliagalega.com), busquei o libro do Éxodo, capítulo 17 e aí podemos ver: 8 Viñeron os amalecitas e atacaron a Israel en Refidim. 9 Moisés díxolle a Xosué: "Escolle uns poucos homes e sae a loitar con Amalec. De mañá eu estarei no cume do outeiro, coa vara de Deus na man".10. Mais si seguimos vemos que dende o punto 13 ata o final do capítulo xa se aclara máis: 13 Xosué venceu a Amalec e á súa xente, a fío de espada. 14 O Señor díxolle a Moisés: "Escribe isto nun libro de memorias, e dille a Xosué que eu borrarei o recordo de Amalec de debaixo do sol". 15 Moisés construíu un altar ó Señor, e chamoulle Señor, miña - bandeira, 16 neste sentido: "Xa que a súa man se levantou contra o trono do Señor, o Señor está en guerra con Amalec de xeración en xeración". Vemos aquí unha declaración de guerra eterna por parte de Deus, mostrando o seu rancor. Pero o mais duro vese no libro de Samuel, no capítulo 15 cando Samuel lle fala a Xaúl e lle di: 2 O Señor dos exércitos di isto: Voulle pedir contas a Amalec do que fixo con Israel, atacándoo, cando este subía de Exipto. 3 Vai, logo, pelexa contra Amalec, destrúe todo o que ten e non teñas dó del. Mátalle homes e mulleres, rapaces e nenos de peito, bois e ovellas, camelos e burros". 4.
Si miramos ben esta última frase subliñada parece que é o que agora está pasando con Gaza, ou o que é o mesmo que Netanyahu mencionou a Amalec e aos amalecitas para xustificar unha matanza baseándose o que di na Biblia. Todos lembramos das pelexas cos filisteos, agora cos palestinos, imos camiño dos 40.000 mortos, mellor dito asasinados, porque cando morren nenos, e tantos como é o caso non son mortos son asasinatos. Netayahu cre, e eu case estou convencido, que ten a Deus do seu lado, que son o pobo elixido e que non haberá forza na terra que pare as súas intencións.
Tamén o equipo legal do Goberno de Sudáfrica usa esta frase dita por Netanyahu na declaración presentada na Corte Internacional de Xustiza (https://www.icj-cij.org/es) contra o Goberno de Israel. Por min poden dicir o que queiran, poden darlle as voltas que queiran os avogados de Israel, mais o que eu vexo, na matanza da rapazada gazatí, na morte lenta por fame, etc, é xenocidio, e punto. O que máis me asombra é ver como determinados políticos, nomeadamente o alcalde de Madrid pode dicir tantas parvadas ao respecto. Usa sempre o que lle convén en cada momento e agora está a darlle caña aos estudantes que se manifestan nas universidades a prol dos palestinos. Así el convértese en altofalante do Goberno de Israel dicindo que os estudantes son antisemitas. Precisamente el, que pertence a un partido cuxo fundador, Manuel Fraga, pediu a excarceración do lugartenente de Adolf Hitler, que estaba xa vello, Rudolf Hess, que si era algo era antisemita. Así que hai que ter moito coidado co que se di que as palabras cargas Iavé, e xa sabemos o mal leite que ten.
Aclaración final: Non hai constancia histórica que os amalecitas existiran como pobo. Aínda así e todo mirade o que se leva montado á súa conta.