28M | Luisa Lores (Podemos): "En Pontevedra fai falta unha verdadera forza de esquerdas. Agora mesmo non a hai"
Aínda que para Luisa Lores sexa a primeira vez que opta á Alcaldía de Pontevedra, non é unha recén chegada á política. Vinculada a Esquerda Unida, formou parte de Marea Pontevedra. Por iso é polo que non dubide en sinalar que agora, á fronte de Podemos, "represento a unidade" da esquerda.
Para esta radióloga, que foi directora asistencial do Complexo Hospitalario de Pontevedra, falta na cidade "unha verdadeira forza de esquerdas". Ela aposta por unha xestión "feminista e social" cun marcado carácter público, empezando por rescatar servizos xa privatizados.
Presentarte a estas eleccións foi unha decisión que te custou tomar?
Empeñáronse moito e eu resistinme bastante, si. Pero ao final cheguei á conclusión de que tiña que dar o paso. Descubrín que me gusta. Estamos a traballar moito e moi ben. Penso que fai falta unha verdadeira forza de esquerdas en Pontevedra, que agora mesmo non a hai.
Falas dunha forza de esquerdas, no caso de Pontevedra representa Podemos esa candidatura de unidade que en Madrid está a custar tanto acordar?
Eu fun toda a vida de Esquerda Unida. Presenteime no seu día por Marea e teño moitos amigos alí. E estou inscrita en Podemos desde hai tempo porque estou de acordo coas súas propostas. Ademais, son amiga de Yolanda Díaz. Fun con ela nas últimas eleccións. A min non me poden preguntar se quero máis a papá ou a mamá. Prefíroos a todos xuntos.
Veste entón como unha candidata de consenso?
En certa maneira, si. Imos xuntos Podemos e Alianza Verde. Esquerda Unida non está nas siglas baixo as que nos presentamos en Pontevedra, pero non se presentaron aparte. Non hai outra candidatura. Dalgunha maneira, creo que tamén os represento a eles.
Que achegaría Podemos á política municipal?
A política realmente de esquerdas, feminista, social e de xestión pública non está representada no Concello. Se cadra é porque xa levan moitos anos. Tras 24 anos, podes sentir que o concello é como o salón da túa casa. Hai que cambiar de modelo de xestión.
"A política realmente de esquerdas, feminista, social e de xestión pública non está representada no Concello. Se cadra é porque xa levan moitos anos"
Unha liña básica do voso programa é a remunicipalización de servizos cuxa xestión está en mans de empresas privadas. Por que o vedes tan necesario?
Non se pode externalizar todo o que che corresponde facer a ti: a auga, a limpeza, o lixo... Eu proveño da sanidade e defendo a sanidade pública desde que nacín. Estou convencida de que o público é moito máis eficiente. Recuperar eses contratos é complexo, pero non imposible. Neste concello hai diñeiro e persoal para poder facelo.
Este cambio de modelo que propoñedes, tamén afectaría o deseño da cidade?
Hai que arrimar o ombreiro e apostar pola ecoloxía. Non só é cuestión de peonalizar. Está ben que non haxa coches no centro, pero hai que ir máis aló. Temos un paradigma de cidade que hai cambiar. Fanse cousas ben pero está obsoleto. Hai que avanzar cara á modernidade.
Con de a ecoloxía, a que te refires?
A que haxa menos cemento e máis árbores. Estamos en Galicia, somos verdes. Tense que notar dentro da cidade. Apostar por un transporte público que sexa eléctrico. Que haxa un circuíto de carrís bici ou un servizo municipal, ao estilo de Glovo, que una a todo o comercio. Para que poidan competir coas grandes áreas. Hai que tecer cidade e o comercio é clave para iso.
Esa sería a vosa aposta para fortalecer o comercio local?
Non só esa. A xente nova necesita un futuro. Hai moitos baixos baleiros que afean a cidade. Pódense rehabilitar con fondos europeos e fomentar o cooperativismo entre os mozos, facilitando que abran comercios, pequenas empresas ou centros culturais. Para que a cidade dos quince minutos funcione, primeiro hai que facer cidade.
En que crees que falla o actual goberno municipal?
Fundamentalmente na transparencia e participación da cidadanía. Son tantos anos que cren que sempre teñen a razón. Pechan Raíña Vitoria e non falan con ninguén. Iso non pode ser. Ten que haber máis participación da cidadanía, xa desde que son pequenos. Nós propoñemos mesmo que unha parte do orzamento se decida na escola e nos institutos.
Desde o Goberno Podemos impulsou numerosas leis sociais. A última delas, a de vivenda. Ese é o camiño que queredes seguir en Pontevedra?
É que a vivenda é importantísima. Hai que construílas, sen dúbida, pero tamén rehabilitalas. Hai máis de 6.000 vivendas baleiras. Temos que detectalas, falar cos seus donos e impulsar un parque municipal de vivendas. Conseguir que os mozos poidan vivir nelas.
"Pontevedra ten que ser unha cidade máis social, máis inclusiva. E ser un concello vivo e creador de emprego. Non pode ser algo estático"
Unha das iniciativas de Marea no pasado mandato foi a renda mínima municipal. Por que crees que non funcionou?
Esta renda mínima municipal non ten sentido. É incompatible co ingreso mínimo vital. O que hai que facer é que sexa compatible con traballos temporais. Temos que axudar a que a xente teña unha vida digna. E, sobre todo, aos maiores. É fundamental unha rede de centros de día municipais e un sistema de transporte público que os traslade.
E que crees que lle falta a Pontevedra para buscar un futuro mellor?
Ten que ser unha cidade máis social, máis inclusiva. Que haxa unha maior accesibilidade nas rúas ou un centro de lecer que nós queriamos que fora en Santa Clara. Incrementar feiras e eventos sectoriais ou ter una unha administración máis amable e menos burocrática. Temos que ser un concello vivo e creador de emprego. Non pode ser algo estático.
Que tipo de empresas consideras que debe atraer a cidade?
Non nos interesan moito as grandes empresas. Son multinacionais que pagan poucos impostos e non crean empregos de calidade. Nós apostamos polos produtos de proximidade e por tentar ser autosuficientes. Hai que impulsar a creación de pequenas e medianas empresas. Non imos pechar nada. Se a competencia lles parece desleal, que sexan eles os que se vaian.
Se tras o 28M foses a alcaldesa de Pontevedra, cal sería a túa primeira medida?
Falar cos traballadores do Concello e preguntarlles que lles pasa. Reunirme con todos os estamentos sociais e coas empresas de servizos. Ler os contratos e ver se se cumpren. E crear un consello de saúde municipal para mellorar os hábitos de vida dos cidadáns.
A Luisa Lores ninguén lle pode discutir o seu compromiso coa sanidade pública. Médica radióloga no Complexo Hospitalario de Pontevedra, sempre foi unha das caras visibles das reivindicacións por unha mellor atención sanitaria. Formalizou a súa parella de feito hai apenas dous anos. Ten dúas fillas e unha neta en camiño.
Cal dirías que foi o momento máis feliz da túa vida?: Sen contar as cousas familiares, cando gañamos as eleccións no Grove. Foi en 1979 co Partido Comunista. Foi espectacular. Só por tres votos.
E o que te cambiou por completo?: Cando o meu compañeiro veu traballar ao Grove e xuntámonos. Iso cambio a miña vida porque el é de Almería.
Estrañas algo da túa infancia?: Non te creas. Non foi a etapa máis feliz da miña vida. Era todo moi complexo. Estou mellor agora.
Unha viaxe que te marcara: Perú, que me encantou. E Xapón, porque a miña filla estivo alí catro anos e pasamos alí o gran terremoto de 2011. Foi moi especial. Pasei moito medo.
Cal foi o mellor consello que che deron?: Que durma ben por estar de acordo comigo mesma. Non me preocupa o que pensan os demais e tiro para adiante.
Unha rutina ou hábito que te manteña enfocada: Estar nesta vida con ganas de vivir xa é máis que suficiente. No traballo o que máis me motiva é o paciente.
E un lugar para desconectar do mundo?: As praias do Grove. Son espectaculares.
Cal dirías que foi o maior desafío que lograches superar?: Son radióloga e debería ser a xefa de servizo. Pero non quixeron. Gañei a praza e non me nomearon. Recorreron e volvín gañar. Agora o tema está no Supremo. Gañar á administración foi un reto que me encantou.
A que tes medo?: Dáme moito medo o machismo e Vox.
Se non vivises en Pontevedra, onde crees que o farías?: No Grove, probablemente.
Que afeccións tes?: Estar na casa ou tomar uns viños coa familia e os meus amigos. Gústame moito tamén a decoración. Se non fora radióloga, sería interiorista.
Recoméndanos un libro: O que estou a ler agora chámase La mirada inquieta, de Eugenia Tenenbaum. É unha muller que analiza a arte desde a prehistoria dunha forma distinta e cuestionando a mirada patriarcal, desmontando mitos. Pero gústame tamén a novela policiaca. Antes deste libro estaba con Montalbano.
E unha película?: Ultimamente vou pouco ao cine. Aínda non fun a ver Matria, que me gustaría poder dicir esa.
Cociñas ou prefires que che cociñen?: Cociño, pero tamén cociña a miña parella que está xubilado. Agora chego a casa a mesa posta. É moi bo cociñeiro.
Que sitio recomendarías para comer?: Vaia compromiso. Gústame comer nos furanchos. Nesta zona hai algúns que son buenísimos. Ou picotear na Praza da Leña. Eu a restaurantes moi finos non vou.
Relacionadas:
-
Luisa Lores preséntase no mitin central de Podemos como a solución para "tirar do BNG cara á esquerda"
Por Manu Otero & Mónica Patxot |
-
Podemos pide que non se desmantelen as vías do antigo tren en Monte Porreiro para non pechar a posibilidade de recuperar o servizo
Por Redacción |
-
Ángela Rodríguez, 'Pam', apoia a Podemos Pontevedra pechando a candidatura para o 28M
Por Redacción |
-
Luisa Lores propón unha repoboación de árbores en Pontevedra
Por Alba Feijoo Alonso |
-
Podemos propón a creación dunha casa de baños pública en Pontevedra
-
Luisa Lores, candidata de Podemos: "Teremos que pactar para ser decisivos como Unidas Podemos a nivel estatal"
Por Mónica Patxot & Anxo Lourido |