Pilar Blanco avanza o seu compromiso "claro e decidido" para construír o auditorio de Marín en dous anos
Por Redacción
O BNG anunciou este martes o seu compromiso "claro e decidido" pola construción dun auditorio nos dous primeiros anos do vindeiro mandato. "Non imos presentar ningunha maqueta, nin facer grandes promesas ou condicionar a súa consecución a que outras administracións asuman o proxecto, senón que asumimos un compromiso explícito coa sociedade para facelo realidade canto antes", sinalou a candidata á Alcaldía, Pilar Blanco.
A nacionalista explicou que "elaboraremos o proxecto que a sociedade de Marín queira" e traballarán para acadar un consenso que permita facelo viable de xeito inmediato, incluíndo a súa localización, "e non trasladar a actuación no tempo como se vén facendo desde hai máis de 15 anos, xa que a cidade non pode agardar máis por un equipamento imprescindible como este".
Neste sentido, lembrou que "o PP utilizou a escusa do seu custe primeiro e da localización despois para non cumprir co que Marín merece", incidindo en que "tras o fracaso de que o concurso para a súa construción quedara deserto por ter un orzamento insuficiente, xogaron con levar o auditorio de Briz ao Parque Eguren, de aí á Praza de España, logo a punta do paseo Alcalde Blanco e agora volven enganarnos con que o farán na Praza de España".
En canto á financiación, a nacionalista explicou que o Concello ten un remanente de cartos importante, como xa o tiña hai catro anos, "que sae do peto dos marinenses e que debe investirse para que conten cos servizos que precisan e merecen". Entende que "resulta absurdo presumir de ter gardados no banco moitos cartos e seguir sen resolver as enormes carencias que ten Marín, como é o caso do auditorio".
O BNG vinculou a consecución deste equipamento a crear un programa cultural estable que permita ofertar alternativas de ocio aos marinenses e visitantes, e con elo contribuír a dinamizar a economía local a través de comercio e a hostalería. A candidata nacionalista afirmou que "xa non podemos permitirnos por máis tempo que outras vilas conten con circuítos culturais, musicais e teatrais que acaban atraendo aos marinenses en detrimento da nosa cidade".
Relacionadas:
-
O BNG de Marín anuncia a súa aposta por un transporte público entre o casco urbano e o Lago de Castiñeiras
Por Oskar Viéitez |
-
O BNG de Marín quere desterrar as políticas do "caciquismo e a venda de favores a cambio de votos do PP"
Por Redacción |
-
O BNG aposta por abrir Marín ao mar e crear un porto deportivo no Paseo Alcalde Blanco
Por Oskar Viéitez |