Moreira promete unha rebaixa xeralizada de impostos e taxas e que os cidadáns poidan pagar a prazos
Por Alejandro Espiño
Desde que goberna "Lorix e Mosquerix", segundo os chamou Jacobo Moreira en referencia ao cómic de campaña do BNG, o goberno municipal subiu un 130% as taxas e impostos. A presión fiscal é de 250 euros por cidadán "por encima de la media de los concellos de Galicia". Por iso, os populares aseguran que se acceden á Alcaldía reducirán o gasto que lle supón aos pontevedreses estas medidas fiscais "porque hay margen para ello".
Acompañado por Rafael Domínguez e Gerardo Pérez, número tres e número oito da súa candidatura, Moreira anunciou que porá en marcha un plan de pago personalizado de tributos fiscais. Permitirán que cada cidadán poida sumar o que paga cada ano en impostos relacionados co padrón (IBI, IAE, IVTM, a taxa da recollida e tratamento de residuos ou taxa por vados permanentes) e fraccionar o seu pagamento..
Deste xeito, sinalou o candidato popular, os veciños poderán facer unha planificación anual do custo dos impostos e taxas municipais e "programar su economía doméstica adaptándola a su disponibilidad económica". A periodicidade poderá ser mensual, bimestral, trimestral ou anual.
Ademais, o PP aposta por aplicar unha redución drástica de impostos e taxas municipais. Así, explicou que propoñen reducir a viñeta un 25% aos turismos, un 50% aos vehículos ecolóxicos -con biocombustible, GLP ou Gas Natural- e un 75% aos taxis. Tamén pensan en eliminar o IBI rústico aos veciños que pagan menos de 100 euros ou incrementar as bonificacións a familias numerosas no IBI urbano e no imposto de obras que favorezan á mellora da accesibilidade.
Jacobo Moreira tamén explicou que o PP eliminará o ‘multamóbil’ se accede á Alcaldía e que destinará todos os cartos que ingresen por multas de tráfico –actualmente 1,3 millóns de euros anuais- a un fondo finalista para a implantación do transporte público urbano, servizo do que carece Pontevedra, "devolviendo a la sociedad pontevedrés el dinero de las multas en forma de servicio" e reducindo os vehículos que transitan pola cidade.
Por último, o candidato do PP asegurou que levará a cabo unha modificación nas restricións de aparcamento en zonas de carga e descarga, eliminándoa nas zonas que non sexan comerciais; e nos lugares próximos aos centros escolares se limitará á franxa horaria que comprende a entrada e saída dos colexios. Serían zonas de aparcamento libre, aínda que os populares estarían dispostos a recuperar o servizo da ORA "si así lo solicitan los vecinos".