![](/web/cache/scene/uploads/fotos/foto/848/_S7QytKoutjK3UsovKMnMzytWsi62MgJyq/Lzc52L8gt0zCwMdI_/_wNDHSSU/NKUot0SvILlKxrAQ==_/653d2ece2f-20231028-saiz-pasaron-partido-pontevedra-b-estrandense-006.jpg)
© Cristina Saiz
O filial do Pontevedra volve ao campo da Seca para enfrontarse ao Arosa
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Despois de varias xornadas xogando os seus encontros na Xunqueira, o Pontevedra B volve a Poio para recibir a visita do Arosa.
A previsión de contar con numerosos afeccionados visitantes está detrás do cambio de escenario, posto que o Estadio da Seca dispón de mellores instalacións e unha maior capacidade con dúas bancadas.
O duelo entre o filial granate e o conxunto arlequinado xogarase o vindeiro sábado 25 de novembro a partir das 16.00 horas.
Segundo confirmou o Pontevedra, as entradas para o choque fixáronse en 10 euros para o público maior de 15 anos. Os menores entre 6 e 14 anos deberán abonar 5 euros, mentres que os máis pequenos contarán con acceso de balde.
Tamén poderán entrar ao recinto sen pasar por despacho de billetes, como é habitual, os abonados da entidade pontevedresa.
Será un encontro importante para ambos os equipos, e é que o Pontevedra B chega á cita da xornada 12 en postos de descenso e tras dúas derrotas consecutivas, mentres que o Arosa é oitavo con 16 puntos pero viu cortada a súa progresión coa derrota na última xornada fronte ao Bergantiños.