A Baixada do Umia redobra a aposta para a súa 29 edición
Por Redacción
É unha cita xa clásica no calendario deportivo comarcal e galego, pero a Baixada Internacional do Río Umia redobra este ano a aposta na que será a súa 29 edición.
A proba de piragüismo, que foi oficialmente presentada este mércores, celebrarase o vindeiro sábado 30 de setembro coa previsión de poder chegar ao medio milleiro de deportistas participantes.
A gran novidade, destacaron na presentación, é que por primeira vez habilitaranse dúas quendas de competición. Por unha banda a partir das 11.00 horas levará a cabo unha 'short race' clasificatoria cun percorrido de 1,7 quilómetros, mentres que xa pola tarde, a partir das 17.00 horas, será o momento do descenso propiamente dito con 7 quilómetros de lonxitude.
A Baixada do Umia, Campionato Galego de Ríos e Travesías 2023, comezará como cada ano na Praia Fluvial de Oubiña para finalizar na Ponte de Cabanelas, en Ribadumia, xunto ás instalacións do Club Náutico O Muíño.
Á presentación da regata acudiron, entre outros, o presidente do club organizador, José Manuel Vázquez Núñez; o alcalde de Ribadumia, Davod Castro, o deputado provincial Javier Mougán; e o presidente da Federación Galega de Piragüismo, Alfredo Bea.