Difícil reto para o Poio FS coa visita do líder e invicto Atlético de Madrid Navalcarnero
Por Redacción
O líder destacado da Primeira División Feminina, o Atlético de Madrid Navalcarnero, visita este sábado o pavillón da Seca (18:30 horas) para enfrontarse a un Poio Fútbol Sala que afronta un dos partidos máis ilusionantes do curso.
Cunha cómoda renda de sete puntos sobre os postos de descenso, as vermellas tratarán de dar a badalada ante un equipo madrileño que aínda non perdeu ningún partido en liga.
Non o terán nada doado as rapazas adestradas por Marcio Santos, pois en fronte terán a un conxunto que conta nas súas filas con cinco internacionais españolas, ademais da brasileira Ju Delgado.
Para afrontar este reto o técnico brasileiro poderá contar con todo o plantel á súa disposición, incluíndo á xogadora da canteira Anita, xa coa alta médica.