UD Ourense, primeiro escollo do Arosa nunha fase de ascenso de tres eliminatorias
Por Manu Otero
Non houbo milagre na última xornada e o Arosa terá que xogarse o ascenso a Segunda Federación no playoff. Os de Luisito non fixeron os deberes e perderon o seu partido contra o Racing Vilalbés, con todo, tampouco lles valería a vitoria porque o Deportivo B gañou ao Barco para certificar o título e ascenso directo.
Dixerido xa o pau, os da Lomba están centrados na fase de ascenso, que comezará a próxima fin de semana coa disputa da primeira das tres eliminatorias que terán que superar os arlequinados para conseguir o salto de categoría.
As dúas primeiras eliminatorias dispútanse entre os equipos galegos. Deste xeito, o Arosa, segundo clasificado, enfrontarase ao UD Ourense, quinto. O cruzamento resolverase a dobre partido e os de Vilagarcía xogarán a volta como locais.
A outra eliminatoria enfronta ao Racing Vilalbés co Rápido de Bouzas. Os gañadores destas roldas enfrontaranse entre si na segunda eliminatoria. En caso de empate tras a prórroga, non haberá lanzamentos de penaltis e pasará o equipo mellor clasificado na liga regular.
No bombo da terceira e definitiva eliminatoria entrarán os 18 equipos, un de cada grupo de Terceira Federación, que superaron as eliminatorias autonómicas. A ida xogarase na cancha do equipo que saia primeiro en cada un dos emparellamentos e, a diferenza das roldas anteriores, neste caso si que haberá penaltis en caso de empate.
Relacionadas:
-
Cun Iñaki estelar, segue adiante o Arosa na loita polo ascenso ao eliminar ao UD Ourense (3-0)
Por Ramiro Espiño |
-
Suspenden dúas semanas o presidente do Arosa por entrar no vestiario arbitral con "menosprezo ou desconsideración"
Por Diego Espiño |
-
A Lomba ditará sentenza para UD Ourense e Arosa na primeira eliminatoria polo ascenso (0-0)
Por Redacción |
-
O Arosa inicia este luns no Couto a carreira polo ascenso a Segunda Federación
Por Redacción |
-
O Arosa xogará a fase polo ascenso a Segunda Federación tras a derrota en Vilalba (2-1)
Por Redacción |
-
O Arosa xógase o ascenso a Segunda Federación cun ollo en Vilalba e outro no Barco
Por Redacción |